Bashkia e Tiranës u përfshi ditën e djeshme në një përplasje mes Edi Ramës dhe Erion Veliajt, ku ai që u tërhoq, duke mos kaluar as 24 orë ishte kryebashkiaku “de jure”.
Fillimisht ishte Erion Veliaj, i cili përmes një shkrese të firmosur nga qelia, shkarkonte nga detyra e kryebashkiakes në detyrë Anuela Ristanin dhe kompetencat e tij ia delegonte Sara Goxhajt. Por, Edi Rama, pasi shkoi në Bashki, ia ktheu mbrapsht Veliajt, madje i kërkoi dhe shkarkimin e Sara Goxhajt dhe Alban Dobrushit, me të cilët pati përplasje.
Lidhur me këtë situatë, ka reaguar edhe Anuela Ristani, e cila përmes një mesazhi dërguar Blendi fevziut në “Opinion”, shprehej se nuk ishte e besuara e Edi Ramës dhe se me kryeministritn për herë të parë kishte biseduar vetëm pas arrestimit të Veliajt. Po ashtu, ajo tha se në bashki nuk është zënë askush “me gishta në vesh” duke shtuar se gjithçka ndodhi me çështjen e delegimit, ishte një keqkuptim.
Gjithsesi, Anuela Ristani nuk i përgjigjej një pyetje shumë të thjeshtë: “Pse Erion Veliaj firmosi shkresën për ta shkarkuar vetëm 1 muaj pasi i kishte deleguar kompetencat e kryebashkiakut dhe se për çfarë ishin keqkuptimet?”.
“Zoti Fevziu ndjesë, por duke ju ndjekur vërej se po përgojohem me të pavërteta që do ishte shumë e lehtë të mësonit se sa të pavërteta janë. Unë nuk jam e besuara e Ramës siç më quajtën aty sepse me kryeministrin nuk kisha komunikuar asnjëherë përpara se të merrja delegimin nga kryetari Veliaj. Dhe në Bashkinë e Tiranës nuk është zënë askush me “gishta në vesh”, ndërsa keqkuptimi i krijuar nga pamundësia e komunikimit normal nuk ka asnjë lidhje nga fishekzjarrët mediatikë të ditës së sotme. Do të vlerësojë leximin e mesazhit tim për të korrigjuar sadopak shtrembërimin e emrit tim në publik, Anuela Ristani”, thuhej në mesazhin e Anueal Ristanit.
