Erion Veliaj ka lënë përkohësisht ditën e sotme qelinë e paraburgimit në burgun e Durrësit dhe i shoqëruar nga forcat e Policisë ka dëshmuar në SPAK në lidhje me hetimet ndaj tij.
Burime për mediat bëjnë me dije se Veliaj është marrë në pyetje në prani të avokatëve të tij Ermir Beta dhe Artur Selmani dhe dëshmia ka zgjatur për rreth 1 orë e 30 minuta. Pas dëshmisë, ai është rikthyer sërish në qeli, teksa nuk kanë dhënë komunikime për mediat, as kryebashkiaku dhe as avokatët.
Burime për mediat bëjnë me dije se në paraqitjen e sotme në SPAK, prokurorët e Prokurorisë së Posaçme i kanë komunikuar shtimin e një akuze të re, atë për futjen e sendeve të paligjshme në qelitë e paraburgimit.
Një ditë më parë në SPAK dëshmoi edhe biznesmeni shqiptaro-belg Elman Abule, i cili ndodhet nën masën “Arrest në shtëpi”, ndërsa para dy ditësh një nga njerëzit më të afërt të Veliajt, Alban Dokushi, i cili është Sekretari i Përgjithshëm i Bashkisë së Tiranës.
Erion veliaj u arrestua mesditën e 10 Shkurtit në Bashkinë e Tiranës, teksa pas një hetimi 1 vjeçar, SPAK i ka ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Biznesmenët Elman Abule, Gentian Sula, Shkëlqim Fusha, Fatmir Bektashi, Meriman Palushi dhe Sokol Kryeziu në këmbim të tenderave nga Bashkia e Tiranës dhe lejeve të ndërtimit, i ofronin Erion Veliajt, shuma monetare nëpërmjet blerjeve fiktive, biletave avioni, sponsorizimeve, OJF-ve të Ajola Xoxës, si dhe pasurive të paluajtshme, si disa vila në Qerret.
Gjithashtu, SPAK i ka hapur një dosje të re Erion Veliajt, aktualisht prej rreth 90 faqesh, e pranuar dhe nga vetë kryebashkiaku, në lidhje me dyshimet se ai ka “orkestruar” nga qelia sulme drejt prokurorëve dhe gjyqtarëve të Strukturës së Posaçme Anti-Korrupsion.
Fillimisht i përgjoi bisedat me të vëllain dhe bashkëshorten nga paraburgimi i Durrësit, të cilat u përdorën për të përforcuar faktet dhe argumentat për ta lënë në qeli edhe pas vendimit të Gjykatës së Posaçme të Apelit.
Ndërkohë së fundmi, hetuesit e BKH-së kanë sekuestruar kamerat e sigurisë së paraburgimit të Durrësit dhe regjistrat e institucionit ku shënohen takimet me të paraburgosurit. SPAK po analizon hyrje-daljet në paraburgimin e Durrësit dhe hetuesit do të identifikojnë dhe do të marrin në pyetje të gjithë personat që e kanë takuar.
Po ashtu se SPAK do të verifikojë edhe nëse Erion Veliaj ka përfituar trajtim të favorshëm në krahasim me të paraburgosurit e tjerë, duke iu lejuar më shumë takime me familjarët apo persona të tjerë.
