Teksa na ndajnë vetëm dy muaj nga zgjedhjet e 11 majit, Partia Socialiste ka mbajtur një mbledhje kryeministri Edi Rama në Pallatin e Brigadave, ku është diskutuar edhe për listën e kandidatëve për deputetë në zgjedhjet e 11 majit.
Takimi zgjati 7 orë, ndërsa i pranishëm ishte kryeministri Edi Rama, ministrat dhe drejtuesve politikë të PS.
U mësua se drejtuesit politik i kanë dorëzuar listat paraprake te kreu i PS por jo në këtë tryezë. Takimet janë zhvilluar “kokë më kokë” mes Ramës dhe çdo drejtuesi politik sa i përket emrave për deputet në çdo qark.
Teksa kemi hyrë në orët e ethshme për ata që duan të jenë pjesë e ekipit socialist, vetë kryeministri mund të garojë në Tiranë, ashtu siç edhe ai ka deklaruar pak ditë pasi kryebashkiaku Erion Veliaj përfundoi pas hekurave.
Skenari është që Edi Rama të jetë në listën e hapur të kryeqytetit, çka do t’i krijonte kreut të PS hapësirë për të kërkuar dhe marrë sa më shumë vota.
Referuar listës së Tiranës, sipas burimeve, duket se do të ketë më shumë gra në listën e sigurtë sesa burra, ndërsa vetë Rama e ka thënë edhe në shtator që deputetët e ashtuquajtur “veteranë”, me më shumë se një mandat nuk do të jenë në listë të sigurt.
Sakaq drejtuesit politik do të jenë në listën e mbyllur, por edhe disa nga ministrat si në Tiranë, Elbasan dhe Vlorë.
Ndërsa kryetari i Bashkisë së Beratit, Ervin Demo, i cili është edhe drejtues politik i qarkut ka shprehur interesin për të qenë në listën e kandidatëve për deputet. Po ashtu një vend në listë e kanë kërkuar edhe kryebashkiakja e Dimalit, Juliana Mema, kreu i bashkisë së Tepelenës, Tërmet Peçi dhe kryetari i bashkisë së Matit, Agron Malaj.
Gjithashtu, mësohet se nuk ka patur një vendim përfundimtar. Ky vendim pritet të merret në Kryesi.
Kujtojmë se emrat e kandidatëve për deputetë duhet të dërgohen në Komisionin Qendror të Zgjedhjeve, deri më 12 mars.
