Media greke Protothema ka publikuar një artikull ku hedh poshtë të gjitha deklarata e kryeministrit shqiptar Edi Rama, i cili kërkon përmirësim të marrëdhënieve shqiptaro-greke.
Sipas Protothemas, Edi Rama po përdor ‘miqësinë fallco’ me Greqinë sot vetëm për fushatë elektorale, pasi sipas saj, në politikën e jashtme punon vetëm për interesat e Ankarasë.
Media greke shton se Rama nuk i ka mirëpritur zyrtarët grekë në Shqipëri ashtu siç duhet, por përkundrazi ai ka organizuar protesta kur ata kanë vizituar Tiranën
“Rama është një politikan i gjithanshëm, për t’u shërbyer interesave të veta, por edhe interesave të një rrethi të zgjeruar të ‘interesave të organizuara’, të cilat, sipas pretendimeve të opozitës, janë të lidhura me krimin e organizuar.
Ai ishte politikani që organizoi dhe metodizoi apelin në Gjykatën e Lartë të vendit për të anuluar Marrëveshjen e Detit me Greqinë, marrëveshje që mbylli një çështje madhore të pazgjidhur në marrëdhëniet greko-shqiptare.
Arsyetimi i gjykatës që miratoi apelin Rama ishte përkthimi në shqip i argumentit të përdorur nga Ministria e Jashtme turke për të kundërshtuar të drejtat sovrane greke në Egje, bazuar në Konventën për të Drejtën e Detit.
Përveç kësaj, Berisha kishte denoncuar publikisht se apeli i ishte diktuar Ramës nga Ankaraja. Rama nuk i ka fshehur lidhjet e ngushta me Ankaranë dhe Tajip Erdogan, të cilin e konsideron si aleatin e tij kryesor.
Arrestimi i Fredi Belerit dhe grushti elektoral në Himare përbënin jo vetëm një mesazh për minoritetin grek dhe Athinën, por edhe një lëvizje për t’u shërbyer interesave ekonomike, të cilat nën mbrojtjen e tij po shkatërrojnë zonat turistike të Shqipërisë, duke cenuar dhe sekuestruar pronat e minoriteteve.
Kjo lëvizje shkaktoi një krizë të madhe në marrëdhëniet greko-shqiptare, e cila kulmoi me vendosjen e ‘Ligjit Rama’ në Himare dhe pasi Beleri kreu dënimin e vendosur nga gjykata e kontrolluar dhe u zgjodh eurodeputet në Parlamentin Europian.
Rama i ka mbështetur vazhdimisht kërkesat e “Çamëve” dhe deklaratat e tij provokuese pak para vizitës në Tiranë në vitin 2018 të ministrit të Jashtëm të atëhershëm, Nikos Kotzias, kishin shkaktuar reagime.
Në fakt, kishte pasur edhe një grumbullim spontan të ‘Çamëve’ jashtë Ministrisë së Jashtme në Tiranë, ku tentuan të pengonin mbërritjen e makinës së ministrit grek.
Rama, duke dashur të hapë rrugën europiane në një moment të vështirë për vendin e tij, u angazhua në tetor 2021 ndaj ministrit të Jashtëm të atëhershëm, Nikos Dendias, që të nisë bisedimet për referimin e mosmarrëveshjes e detit në Hagë.
Kjo zgjedhje ishte një lëshim i Athinës ndaj Tiranës, pasi marrëveshja e mëparshme ishte nënshkruar nga të dyja palët dhe do të duhej të ushtroheshin çdo lloj presioni për ta ratifikuar atë, qoftë edhe me modifikime të vogla.
Që atëherë, fillimisht u bënë dy-tre takime ekspertësh dhe më pas Rama e ngriu procesin.
Sot ai shfaqet sërish përmes intervistës së tij për t’i ‘shitur’ Greqisë angazhimin e tij në vitin 2021, të cilin ai vetë e ka lënë në sirtar”, shkroi Protothema.
