Një ditë pas njoftimit të anulimit të fazës së dytë të garës për zhvillimin e LIFT Tower, në një marrëveshje mes shtetit dhe privatit, Korporata e Investimeve Shqiptare, rihapi nga e para procedurën për projektin në fjalë.
LIFT Tower është pjesë e nënprojektit të “Ndërtimi dhe menaxhimi i godinës së Kadastrës Shqiptare” ku shteti synon që përmes lëshimit të pronave të tij të përfitojë hapësira për zyra.
Në këtë fazë të parë kur kompanitë duhet të paraqesin dokumentacionin teknik në përmbushje të kushteve që janë vënë nga ana e Korporatës është bërë e ditur që afati i fundit për të dorëzuar aplikimet është 17 prilli 2025.
“Projekti i investimit synon të transformojë hapësirat dhe godinat e vjetra shtetërore që shfaqin aktualisht shenja amortizimi, degradimi dhe infrastrukturë të vjetëruar, jo bashkëkohore dhe ku kushtet ekzistuese tregojnë nevojën për të përmirësuar cilësinë e pronave.
Interesi publik që përndjek projekti i investimit konsiston në përmirësimin e kushteve të punës së funksionarëve publikë, si dhe në energjizimin e qytetit duke sjellë zhvillimin e zonave urbane ku ndodhen pronat.
Projekti realizohet nëpërmjet një modeli partneriteti, ku Korporata ka rolin e zhvilluesit dhe ndërmjetësuesit midis institucionit publik që ka interes të zhvillojë pronat e tij dhe të përfitojë godina bashkëkohore dhe partnerit privat, që posedon burimet financiare, njerëzore dhe kapacitetet ekzekutive dhe ka interes në realizimin e projektit të investimit” thuhet në njoftimin e bërë nga Korporata.
Ashtu si në garën e parë edhe këtë herë do të ketë dy faza të saj ku në të dytën do të luajë rol paraqitja e ofertës ekonomike ku kriteri bazë është përqindja më e lartë e sipërfaqes përkatëse e ofruar për Korporatën në ndërtesën LIFT Tower mbi kriterin bazë.
Dy kompani aplikuan në procedurën e parë
Në shkurt Korporata do të njoftonte se për nënprojektin ndërtimi dhe menaxhimi i godinës së Kadastrës Shqiptare me titull kontrate “Zhvillimi nëpërmjet LIFT Tower ishin dy kompani që morën pjesë në fazën e parë dhe që pas vlerësimit kaluan gjithashtu në fazën e dytë: Shoqëria “EDIL AL IT” shpk dhe Shoqëria “DK Construction ONE Corp”.
Por në fazën e dytë kur kompanitë duhet të paraqisnin ofertat e tyre ekonomike sipas Korporatës nuk u paraqit asnjë e tillë brenda afatit, bëri që procedura të anulohej për ti hapur rrugë edhe një herë rifillimit nga e para.
Paralelisht me LIFT TOWER Korporata njoftoi se procedura tjetër për VOID Tower që parashikon një ndërtim në Bulevardin Zhan D’Ark pjesë e nënprojektit të zhvillimit të kompleksit governativ tek Autoriteti i Aviacionit Civil u fitua nga A.I.B.A Kompani.
Zhvillimi i pronave shtetërore
LIFT Tower dhe VOID Tower nuk janë projektet e vetëm që po zhvillohen në këtë formë ku shteti synon të përfitojë hapësira të reja për shfrytëzim pa mbajtur kosto.
Në faza të ndryshme të garës janë disa të tilla si stadiumi “Selman Stërmasi”, Biblioteka e re Kombëtare apo vilat qeveritare në Velipojë dhe Vlorë, si pjesë e nënprojektit “Hospitality”. Së fundmi edhe Pallati i Kongreseve i njoftuar nga Kryeministri por ende pa një garë të hapur./MONITOR
