Mesnatën e kaluar është mbyllur afati për regjistrimin në platformën e KQZ-së të emigrantëve shqiptarë që duan të votojnë me postë në zgjedhjet parlamentare të 11 Majit 2025.
Sipas shifrave të Komisionit Qendror i Zgjedhjeve, janë 294, 155 mijë shqiptarë të diasporës që kanë bërë kërkesën për regjistrim, prej të cilëve iu është miratuar kërkesa vetëm 231,678 zgjedhësve.
Po ashtu, KQZ sqaron se 41,961 zgjedhës nuk kanë mundur të regjistrohen për të hedhur edhe ata votën për zgjedhjet e 11 majit, pasi kërkesa e tyre është refuzuar. Ndërkohë, sipas të dhënave nga KQZ, janë 20,465 kërkesa në shqyrtim, për të cilat Komisioni Qendror i Zgjedhjeve ka 5 ditë afat për shqyrtimin e tyre.
Ditën e djeshme Partia Demokratike kërkoi në KQZ zgjatjen e afatit për regjistrimin e diasporës deri më 9 mars, por nuk u gjet dakordësia në Komisionin Rregullator. PS ishte dakord me shtyrjen e afatit vetëm për rreth 42 mijë të refuzuarit, që t’u jepej mundësia të aplikonin saktë.
Pjesa më e madhe e kërkesave për regjistrim është bërë nga Italia, Greqia, Gjermania, SHBA dhe Britania. Prej 148,178 mijë kërkesa për regjistrim nga Italia, vetëm 86,431 mijë janë miratuar; nga Greqia u regjistruan 103,421 zgjedhës prej të cilëve u miratuan 62,546; nga Gjermania 36,546 zgjedhës kërkuan të regjistrohen, por u miratuan 24,413 prej tyre.
Lista paraprake me emër, mbiemër, qarku ku shkon vota dhe shtet nga vjen zarfi, do të publikohet më datën 9 mars. Vetëm ata që janë në sistem dhe kanë pasaktësi në regjistër, kanë 48 orë kohë të kërkojnë ndryshime.
Sa i takon qarqeve ku do të votojnë zgjedhësit nga jashtë, Tirana ka numrin më të lartë të kërkesave të aprovuara, konkretisht 49.370 zgjedhës. Tirana është po ashtu qarku që prodhon numrin më të madh të mandateve, plot 37 mandate. Fieri është qarku i dytë me numrin më të lartë të votuesve nga jashtë, ndjekur nga Durrësi, Elbasani, Korça, Vlora, Shkodra, Berati, Lezha, Dibra, Gjirokastra dhe Kukësi.
Kujtojmë se këto janë zgjedhjet e para, ku diaspora shqiptare do të ketë mundësinë për të votuar me postë.
Të dhënat për zgjedhës
294,104 Zgjedhës (unikë) që kanë bërë kërkesë për regjistrim
231,674 Zgjedhës (unikë) të cilëve u është miratuar kërkesa
41,962 Zgjedhës (unikë) të cilëve u është refuzuar kërkesa
Tabela me zgjedhësit e miratuar sipas qarqeve
Tiranë 49,370 zgjedhës ose 21.3%
Fier 30,671 zgjedhës ose 13.2%
Durrës 23,774 zgjedhës ose 10.3%
Elbasan 23,650 zgjedhës ose 10.2%
Korçë 19,579 zgjedhës ose 8.5%
Vlorë 18,609 zgjedhës ose 8.0%
Shkodër 16,362 zgjedhës ose 7.1%
Berat 15,221 zgjedhës ose 6.6%
Lezhë 13,751 zgjedhës ose 5.9%
Dibër 8,983 zgjedhës ose 3.9%
Gjirokastër 7,953 zgjedhës ose 3.4%
Kukës 3,751 zgjedhës ose 1.6%
