Të moshuarit apo sëmurët kronikë që e kanë të pamundur lëvizjen kanë marrë shërbim shëndetësor brenda banesës së tyre, nga infermierët e zonave ku ata janë të regjistruar.
Drejtoresha e Operatorit të kujdesit Shëndetësor, Jeta Deda bëri me dije se ky shërbim ofrohet prej viti 2022 në disa zona dhe pacientët përfitues janë identifikuar nga vetë mjekët e familjes.
“Janë rreth 5200 pacientë që gjatë vitit 2024 e kanë marrë shërbimin dhe janë diku tek 58 mijë 700 vizita që janë kryer tek këta të sëmurë nga stafet shëndetësore”, thotw Deda.
Është mjeku i familjes, që pas identifikimit të nevojave të këtyre pacientëve, përcakton dhe grafikun e vizitave dhe shërbimeve që ju ofrohen në banesë.
“Shërbimet janë vlerësimi i shenjave të jetës, respiracioni, pulsi, temperatura, arteriotensioni, por bëhen dhe shërbime të tjera si mjekim plagësh, test i shpejt për virozat e stinës, ushtrime bazike aktive, përdorimi i pompës, përdorimi i kateterit urinar ose venoz”, shpjegon ajo.
Shërbimi shëndetësor në banesë deri në tetor të vitit 2024, është ofruar nga 12 prej 36 njësive vendore të kujdesit shëndetësor. Dibra dhe Fieri janë vlerësuar si dy zona model në ofrimin e këtij shërbimi, të cilat kanë trajnuar dhe njësitë e tjera, ndërkohë që për 2025 shërbimi është shtrirë në të gjithë vendin.
