Për vite me radhë, varësia nga teknologjia është parë si një problem që prek kryesisht fëmijët dhe adoleshentët. Telefonat inteligjentë, rrjetet sociale dhe videolojërat janë konsideruar si rrezik për brezat e rinj. Por sot, vëmendja e ekspertëve po zhvendoset gjithnjë e më shumë drejt një grupi tjetër: të moshuarve.
Nuk bëhet fjalë për njerëz që janë rritur me internetin. Përkundrazi, janë persona që e kanë jetuar pjesën më të madhe të jetës pa teknologji dixhitale, por që sot e kanë të vështirë të ndahen nga telefonat e tyre inteligjentë.
Sipas specialistëve, gjithnjë e më shumë të moshuar po e jetojnë përditshmërinë përmes ekraneve. Në Britani, Qendra Kombëtare për Çrregullimin e Lojërave, e krijuar fillimisht për të trajtuar varësinë e të rinjve nga videolojërat, ka nisur të pranojë edhe pacientë mbi 40 vjeç. Rasti më ekstrem ka qenë ai i një 72-vjeçareje e varur nga lojërat në telefonin inteligjent.
Ekspertët theksojnë se brezi i sotëm mbi 60 vjeç nuk është i shkëputur nga teknologjia. Ata janë brezi i parë që u përball me internetin në moshën e mesme, punuan me kompjuterë dhe organizuan jetën e tyre përmes ekraneve. Koha e lirë pas daljes në pension, në shumë raste, nuk çon në shkëputje nga teknologjia, por në përdorim edhe më intensiv të saj.
Televizori mbetet një pjesë e rëndësishme e përditshmërisë, por nuk është më i vetmi ekran. Telefonat inteligjentë, tabletët, televizorët smart, orët inteligjente dhe aplikacionet e komunikimit janë tashmë pjesë e jetës së përditshme të të moshuarve. Edhe videolojërat, dikur të lidhura vetëm me adoleshentët, po gjejnë vend tek pensionistët e ardhshëm.
Të dhënat nga Britania tregojnë se personat mbi 75 vjeç shikojnë mbi pesë orë e gjysmë televizor në ditë dhe kalojnë më shumë se tre orë në internet. Në total, ata shpenzojnë më shumë kohë para ekraneve sesa të rriturit e rinj. Ndërkohë, personat mbi 65 vjeç kanë më shumë gjasa të zotërojnë tableta ose televizorë inteligjentë sesa të rinjtë nën 25 vjeç.
Megjithatë, varësia në moshë të thyer nuk shfaqet gjithmonë në mënyrë të dukshme. Ajo shpesh fshihet pas rutinës së përditshme. Studime të ndryshme ndërkombëtare kanë treguar se përdorimi i tepërt i telefonit tek të moshuarit lidhet me më pak aktivitet fizik, cilësi më të dobët të gjumit dhe rrezik për varësi dixhitale.
Nga ana tjetër, ekspertët theksojnë se teknologjia nuk ka vetëm pasoja negative. Për shumë të moshuar që vuajnë nga izolimi social, problemet shëndetësore apo lëvizshmëria e kufizuar, interneti është një urë e domosdoshme me botën. Ai ndihmon në komunikimin me familjen, pjesëmarrjen në aktivitete sociale dhe ruajtjen e lidhjeve emocionale.
Sipas studimeve të fundit, përdorimi i moderuar i teknologjisë mund të ndihmojë edhe në ruajtjen e funksioneve njohëse. Ndryshe nga të rinjtë, të moshuarit kanë tashmë identitet dhe marrëdhënie të formuara, ndaj ekranet shpesh nuk i zëvendësojnë ato, por i plotësojnë.
