Policia e Lezhës ka dalë me një komunikatë për mediat në lidhje me arrestimin e 46-vjeçarit Jetmir Llanaj, i cili është kapur nga forcat RENEA në Mamurras.
Llanaj është vënë në pranga, pasi nga hetimet e kryera nga Prokuroria e Lezhës dyshohet se 46-vjeçari dhe 4 të tjerë (konkretisht një i arrestuar dhe 3 të proceduar penalisht, më datë 19 Shkurt), të organizuar si grup, iu vendosnin gjoba bizneseve, duke ushtruar presion dhe kanosur me armë, me qëllim përfitimin pasuror të padrejtë.
Këtë veprimtari kriminale, Jetmir Llanaj e kryente teksa kishte vetëm pak kohë që kishte dalë nga burgu.
Policia bën me dije se gjatë veprimeve hetimore në lidhje me këtë veprimtari kriminale, Llanajt dhe 4 të tjerëve iu sekuestrua 1 armë gjahu, municion luftarak dhe 2 automjete të blinduara, të cilat përdoreshin për të kryer veprimtarinë kriminale të shtrëngimit me anë të kanosjes, për dhënie pasurie.
Jetmir Llanaj është një personazh i njohur i botës së krimit. Ai njihet si autori i vrasjes së Gentian Shkretës dhe plagosjes së vëllait të tij, Emanuel Shkreta. Ai e kreu krimin, pasi mori hak për vrasjen e djalit të tij 9-vjeçar, Indrit Llanaj në vitin 2012.
Jetmir Llanaj u dënua me 25 vite burgim nga shkalla e parë, por Apeli e uli, ndërsa mësohet se prej disa muajsh e kishte kryer dënimin dhe ndodhej në liri. Hakmarrja mes fiseve Llanaj dhe Shkreta ka shkatuar disa viktima.
Ndërkohë, Policia e Lezhës ka publikuar edhe pamjet kur Jetmir Llanaj neutralizohet nga forcat RENEA.
