Aventura e Sergio Conceicao-s në krye të stolit të Milanit mund të zgjasë shumë më pak nga sa pritej. Eleminimi nga Champions League, rezultatet e dobta në Serie A, atmosfera e brendshme në ekip aspak e mirë, të gjitha këto janë arsye që drejtuesit e klubit kuqezi të shkarkojnë Conceicao-n. Mediat italiane bëjnë më dije se kanë filluar që tani të dalin emra që shihen si pasues të portugezit në krye të stolit të kuqezinjve.
Emri më i përfolur i momentit është ai i Xavi Hernandez, spanjolli ka qenë “pushim” pas largimit nga Barcelona vitin e kaluar dhe tashmë është gati për t’u rikthyer në aksion. Spanjolli shihet nga drejtuesit e Milanit si profili i duhur për t’i besuar drejtimin e ekipit të tyre.
Përvoja e tij në La Liga dhe njohuritë e tij për futbollin sulmues mund të përshtaten më së miri me filozofinë e klubit kuqezi. Përveç kësaj, periudha që drejtoi Barcelonën tregoi aftësinë e tij për të menaxhuar një dhomë të zhveshjes plot me emra të mëdhenj dhe për të punuar me talente të rinj, diçka që mund të jetë kyçe në rindërtimin e Milanit.
