Avokati Sajmir Vishaj tha në emisionin “Të paekspozuarit” tha se është një praktikë e gabuar ajo që po ndodh në SPAK dhe në Gjykatën e Krimeve të Rënda, duke theksuar se përdorimi i kërcënimeve dhe shantazheve për të manipuluar gjykatat është i papranueshëm.
Vishaj theksoi se ky nuk është rasti i parë i përdorimit të kërcënimeve ndaj trupave gjykues, dhe se këto metoda shkelin rëndë integritetin e sistemit të drejtësisë.
Ai gjithashtu u shpreh se është e gabuar të përdoren emra prokurorësh dhe gjykatësish për të shkaktuar tensione dhe larguar ata nga pozitat e tyre, duke theksuar se proceset gjyqësore duhet të bazohen në prova dhe ligj, jo në presion politik apo shantazh.
“Ky nuk është rasti i parë që ka ndodhur në SPAK ose në Gjykatën e krimeve të rënda. Ka ndodhur edhe më parë, kur GJKKO-ja gjykonte një nga të fortët, i cili kishte humbur në gjykimin e shkurtuar dhe filloi të kërcënonte të gjithë anëtarët e trupit gjykues. Ai i fyeu me fjalë të rënda, duke i kërcënuar që të hiqnin dorë nga gjykimi, dhe ata ranë në kurth. Filluan të tërhiqnin ankimimet ose bënin kallëzime. Pasi kjo ka ndodhur, çdo kallëzim që bëhet do të çojë automatikisht në largimin e trupit gjykues, siç ndodhi në këtë rast.
Ky është një gabim i madh që po ndodh. Duhet të flasim për institucionet dhe jo për individët. Ka avokatë që e dinë se mbrojtja më e mirë është sulmi, por sulmi duhet të bazohet në prova të forta. Deri tani, ai nuk ka provuar asnjëherë se është i pafajshëm. E kanë marrë në arrest, e kanë çuar në burg, por ende nuk ka pasur prova për fajin e tij. Askush nuk ka ngritur akuza ndaj tij deri tani. Ai është ende në hetim dhe nuk ka ende një vendim për fajësinë e tij.
Përmendja e emrave për të larguar dikë është një taktikë shumë e gabuar. Nuk është e drejtë që të përdoren kërcënime për të larguar një person nga pozita e tij. Kjo është një mënyrë e gabuar për të trajtuar çështjen. Po përmendet emri i një prokurori pa arsye dhe kjo mund të dëmtojë edhe reputacionin e atij që po heton. Ka ndodhur më parë që njerëz të tjerë janë akuzuar dhe kanë marrë pafajësinë ose fajësinë për çështje që nuk kanë lidhje me ta. Kjo është e gabuar dhe duhet të ndryshojë.
Ky është një rrezik për sistemin e drejtësisë dhe për shoqërinë në përgjithësi. Politika dhe krimi shpesh janë të lidhura, por duhet të ndalojmë që ato të ndikojnë në drejtësinë dhe të dëmtojnë proceset e hetimit dhe gjykimit. Në çdo çështje që ka rrezikshmëri, duhet të jemi të kujdesshëm dhe të mbrojmë integritetin e drejtësisë, për të siguruar që ligji të zbatohet në mënyrë të barabartë për të gjithë.”
