Një tragjedi është regjistruar në familjen Hasmegaj nga fshati Mjedë i Vaut të Dejës, ku një fëlmijë 3-vjeçar ka humbur jetën, ndërsa e motra e tij, 7 vjeçe ndodhet në gjendje kritike në Pediatrinë e QSUT-së
Policia e Shkodrës, përmes një komunikatë për mediat, raporton se dy fëmijët ishin paraqitur që paraditen e të premtes në spital, të dyshuar me virozë stine, dhe pas marrjes së mjekimit ishin dërguar sërish për në shtëpi.
Ndërkohë, ditën e shtunë, për shkak të rëndimit të gjendjes shëndetësore, dy fëmijët janë dërguar sërish në spitalin e Shkodrës, ku fatkeqësisht 3-vjeçari ka ndërrruar jetë, ndërsa e motra është dërguar tek Pediatria e QSUT-së në Tiranë.
“Më datë 21.02.2025, shtetasi S. H. ka dërguar për mjekim në Repartin e Pedriatrisë në Spitalin Rajonal Shkodër, 2 fëmijët e tij, vajzën 7 vjeçe dhe djalin 3 vjeç, të dyshuar me virozë stine. Pas mjekimit, shtetasi S. H. dhe 2 fëmijët janë larguar në banesë.
Për shkak të rëndimit në gjendjes shëndetësore të fëmijëve, në banesë, më datë 22.02.2025, shtetasi S. H. i ka dërguar përsëri 2 fëmijët për mjekim në Repartin e Pedriatrisë në Spitalin Rajonal Shkodër. Pavarësisht ndihmës mjekësore, 3-vjeçari ka humbur jetën, ndërsa 7-vjeçarja u dërgua në QSUT, për mjekim të specializuar. Në drejtimin e Prokurorisë vijojnë hetimet për përcaktimin e shkakut të humbjes së jetës së 3-vjeçarit.” – njofton Policia.
Ndërkohë, burime nga spitali i Shkodrës bëjnë me dije se fëmijët e mitur janë paraqitur në spitalin rajonal të Shkodrës ditën e premte rreth orës 10:00 të paradites dhe pasi iu është bërë serum, janë larguar për në banesën e tyre bashkë me prindërit.
Sipas Spitalit të Shkodrës, mjekët kanë ndjekur të gjitha protokollet mjekësore, duke i kërkuar familjarëve që fëmija të qëndronte në observacion për mbikëqyrje të mëtejshme. Megjithatë, sipas tyre prindërit kanë firmosur dhe kanë zgjedhur ta marrin në shtëpi.
Një ditë më pas, gjendja shëndetësore e fëmijëve është përkeqësuar dhe dy fëmijët janë dërguar sërish në spitalin e Shkodrës nga prindërtit e tyre në gjendje të rënduar.
Sipas spitalit, 3-vjeçari ka qenë me insuficiencë kardiake (puls të ulët, shenja jetësore shumë të ulëta) dhe është dërguar menjëherë në reanimacion, por fatkeqësisht nuk ka mundur të mbijetojë, duke ndërruar jetë 10 minuta pas mbërritjes në spital.
Ndërkohë, motrës së tij, që po përjetonte simptoma të ngjashme, mjekët i kanë ofruar ndihmë të menjëhershme dhe e kanë transportuar drejt Tiranës për trajtim më të specializuar. Gjendja e saj mbetet kritike, ndërsa mjekët po bëjnë të pamundurën për ta shpëtuar.
Ndërkohë, raportohet se nëna e fëmijëve, që është 37 javëshe shtatzënë, ndodhet në gjendje të rëndë emocionale dhe traumatike pas humbjes së djalit të saj.
Spitali i Shkodrës thotë se nuk ka dijeni për të dhe se ajo nuk është paraqitur për të marrë ndihmë mjekësore.
Mjekët e Shkodrës thonë se kemi të bëjmë me helmim në gjak, ndërkohë analizat janë nisur për në repartin e toksikologjisë në Tiranë, ku do të zhvillohen hetimet.
Ndërkohë, burime për mediat nga QSUT bëjnë me dije se mjekët dyshojnë për një intoksikacion të rëndë nga ilaçi kundër minjve.
Mësohet se prindërit kishin kryer spërkatjen e një magazine me këtë substancë toksike, ndërsa kishin me vete edhe fëmijët. Mendohet se ata mund të kenë thithur ose kanë pasur kontakt me helmin, duke shkaktuar simptoma të rënda që çuan në tragjedinë fatale.
