Ndeshja e javës së 26-të të Premier League, Everton-Manchester United, ka dhuruar emocione. Barazimi 2-2 nuk i ka lënë plotësisht të kënaqura të dyja skuadrat, sidomos vendësit, që ishin në epërsinë e dyfishtë.
Ngushëlluese mbetet përmbysja për “Djajtë e Kuq”, të cilët u ndëshkuan dy herë, nga Beto 19’ dhe Doucoure 33’. Pjesa e parë u mbyll me këtë rezultat, 2-0 për Evertonin, ndërsa e dyta ishte tablo krejt tjetër.
Reagimi i skuadrës së Amorim ishte bindës dhe solli kthimin e ndeshjes në barazpeshë.
Fillimisht e ngushtoi rezultatin (2-1) kapiteni Bruno Fernandes 72’, pastaj barazoi (2-2) Ugarte 80’. Në kohën shtesë, VAR-i nuk legjitimoi një penallti të pretenduar nga vendësit.
Me këtë barazim, Evertoni pozicionohet në vendin e 12-të për momentin, me 31 pikë, ndërsa “Djajtë e Kuq” në vendin e 15-të me 30 pikë.
