Komisioni Qendror i Zgjedhjeve ka përfunduar numërimin dhe procesimin e 100 për qind të votave në zgjedhjet e fundit parlamentare në Kosovë. Lëvizja Vetëvendosje dalë e para. Në vendin e dytë është Partia Demokratike e Kosovës, ndërsa në vendin e tretë Lidhja Demokratike e Kosovës.
Komisioni Qendror i Zgjedhjeve pas afro dy javë nga mbajtja e zgjedhjeve më 9 shkurt, ka arritur të përmbyll procesin e numërimit të të gjitha votave të rregullta për subjektet politike.
Tashmë në ueb faqen e KQZ-së figuron që numërimi i votave ka përfunduar 100% në 2 mijë e 533 vendvotime.
Si rezultat i kësaj, Lëvizja Vetëvendosje është partia e parë më 40.80% apo 342 mijë e 281 vota.
E dyta renditet Partia Demokratike me 22.03% apo 184 mijë e 811 vota.
Në vendin e tretë sipas KQZ-së është Lidhja Demokratike e Kosovës me 17.63% apo 147 mijë e 888 vota
Në vendin e katërt koalicioni AAK-Nisma me 7.46% apo 62 mijë e 588 vota.
Kujtojmë se ende nuk janë numëruar votat me kusht, ato me postë dhe votat e personave me nevoja të veçanta.
Në bazë të këtyre rezultateve, Eugen Cakolli nga koalicioni i organizatave joqeveritare, Demokracia në Veprim thotë se Lëvizja Vetëvendosje do t’i ketë 47 deputetë, Partia Demokratike e Kosovës do t’i ketë 25, Lidhja Demokratike e Kosovës 20 dhe AAK-Nisma 8 deputetë.
Votat me postë, ato me kusht dhe votat e personave me aftësi të kufizuara nuk janë numëruar ende.
Cakolli ka thënë se është “praktikisht pothuajse e pamundur” që LVV-ja t’i sigurojë 50 apo 51 ulëse në Kuvend edhe pasi të jenë numëruar votat me postë. Për ta arritur në atë numër, ai tha se kësaj partie i duhen “mbi 90% të votave të diasporës”.
Ndërsa janë numëruar shumica e votave të kandidatëve për deputetë, KQZ-ja ka paralajmëruar të martën se para shpalljes së rezultateve përfundimtare po përpiqet t’i publikojë rezultatet e votave të kandidatëve të të gjitha partive politike për deputetë të cilat i kanë arritur deri më tani.
“Sa i përket çështjes së rezultateve të kandidatëve për deputetë, Komisioni Qendror i Zgjedhjeve është duke bërë përpjekje që para shpalljes së rezultateve përfundimtare për subjektet politike dhe kandidatët për deputetë, t’i publikojmë këto rezultate për vendvotimet të cilat janë numëruar në qendrat komunale të numërimit deri më tani dhe pastaj edhe rezultatin nga vendvotimet të cilat do të numërohen në vazhdim”, ka thënë zëdhënësi i KQZ-së, Valmir Elezi.
Më 9 shkurt qytetarët e Kosovës iu drejtuan kutive të votimit që në orët e para të ditës.
Deri në ora 19:00 kur edhe u mbyllën kutitë e votimit qytetarët patën mundësin që të votojnë për subjektin politik dhe për 10 kandidatë për deputetë.
Në kuadër të kësaj ,procesi i votimit eci mirë por jo edhe numërimi i votave.
Që nga ajo natë ueb-faqja e KQZ-së pati vazhdimisht probleme. Si fillim kjo ueb-faqe doli jashtë funksionit, më pas dha rezultate të gabuara (dezinformatë) ku përqindja e Vetëvendosjes shkoi mbi 55% e partitë e tjera ranë krejtësisht poshtë.
Duke vazhduar kështu për shumë ditë radhazi server ishte shumicën e kohës jashtë sistemit.
Madje në lidhje me këto probleme Prokuroria pati udhëzuar Policinë e Kosovës që të kryejë hetim e që të dihet nëse pati ndonjë vepër penale.
Në lidhje me këtë situatë të krijuar dje ambasadori gjerman, Jorn Rohde deklaroi se Serbia ndërhyri në zgjedhjet në Kosovë, për t’i siguruar Listës Serbe më tepër vota.
Tashmë KQZ-ja njoftoi se ka përfunduar numërimi i votave për subjektet politike, derisa numërimi për kandidatët po vazhdon. Më pas pritet që të vazhdohet me numërimin e votave me kusht dhe ato nga diaspora.
Lëvizja Vetëvendosje, e cila ka siguruar më së shumti vota në këtë proces zgjedhor, është zotuar se do ta formojë Qeverinë e re, ndonëse me rezultatet aktuale, ajo nuk i ka 61 deputetë për miratim të kabinetit të ri qeveritar.
Partitë opozitare, PDK, LDK, dhe AAK, kanë hedhur poshtë mundësinë e krijimit të koalicionit me LVV-në dhe kanë shprehur gatishmëri për formimin e një Qeverie së bashku.
