Edi Rama, gjatë përgjigjeve me ndjekësit në rrjetet sociale, ka kritikuar Prokurorinë e Posaçme (SPAK) në lidhje me ngritjen e një TaskForce që do të hetojë krimet zgjedhore, për zgjedhjet parlamentare të 11 Majit, edhe pse duhet theksuar se kjo ka qenë një rutinë e Prokurorive për çdo palë zgjedhjeve.
Rama deklaroi se pushtetet janë të ndara dhe nuk mund të cënohen të drejtat e pushtetit ekzekutiv. Sipas tij, nuk mund të survejohen partitë politike në një proces elektoral, të cënohen të drejtat për të marrë vendime, të trysnohet administrata e shtetit apo të paragjykohen.
Ai e konsideroi si një “lajthitje e momentit” dhe “urdhëroi” që të ndalohet menjëherë çdo lloj survejimi në terren i partive politike. Për Ramën, SPAK-u është i pavarur, por jo profesional.
Edi Rama: Fatkeqësia është se gabimet e tyre nuk janë si gabimet e ndërmarrjes së gjelbërimit, por kushtojnë jetë njerëzish, trauma dhe plagë psikologjike nganjëherë të pariparueshme por nuk ka alternativë tjetër përvec një drejtësie të pavarur profesionale dhe që respekton integritetin, liritë e të drejtat e njeriut. Të pavarurën e kemi para syve, profesionalen duhet të luftojmë së bashku ta konsolidojmë se ka shumë gjëra pozitive por dhe negative. Edhe një rast kur shkatërrohet jeta e një njeriu për budallallëk profesional është shumë. Nuk mund të lejohen qasje të ish sigurimit të shtetit.
Është betejë për tu bërë si aleat e partnerë të drejtësisë, pushtete të ndara, por të vendosur sepse nuk mund të cënohen të drejtat e pushtetit ekzekutiv. Nuk mund të cënohen të drejtat për të marrë vendime, të trysnohet administrata e shtetit apo të paragjykohen.
Dhe nuk mund dot të survejohen partitë politike në një proces elektoral. Uroj të jetë lajthitje e momentit dhe menjëherë të ndalet çdo lloj survejimi në territor, sepse nuk mundet kurrën e kurrës të kthehemi në kohërat e errëta se kush merret me politike të survejohet. Dalja në këto pozicione është ndërhyrje në liritë dhe të drejtat politike të shqiptarëve dhe përfaqësuesve të tyre. Nuk duhet të interferojmë tek njëri tjetri.
