Gropa, kanale në rrugë, trotuare dhe kudo. Kjo është panorama që ofron prej gati një viti qyteti i Elbasanit. Baltë dhe gropa me ujë në ditët me shi, pluhur në kohë me diell.
Investimi i nisur nga ujësjellës-kanalizme për të siguruar 24 orë ujë, e ka kthyer qytetin në një kantier ndërtimi. Mjete që dëmtohen në çdo rrugë, trotuare të çarë dhe qytetarët që një pjesë duket se po mësohen më këtë anormalitet.
Në fakt edhe vetë bashkia e ka kuptuar që është e patolerueshme që qyteti të kthehet në një gërmadhë prej një vit në emër të investimit të ujësjellësit dhe për këtë arsye në një njoftim në rrjetet sociale ka bërë me dije se pas masave administrative të Bashkisë Elbasan dhe kërkesave të vazhdueshme të qytetarëve, Ujësjellës-Kanalizime Rajoni Elbasan ka nisur punimet për rehabilitimin e rrugëve, rrugicave dhe trotuareve të dëmtuara gjatë shtrirjes së tubacioneve të reja të ujësjellësit dhe kanalizimeve./A2
