Kryeministri britanik, Keir Starmer, do të udhëtojë në Washington javën e ardhshme për të takuar Presidentin e SHBA Donald Trump, pasi ai pritet të marrë pjes ënë diskutimet mes amerikanëve dhe rusëve mbi Ukrainën.
“Kryeministri është i kënaqur të takohet me Presidentin Trump së shpejti për të diskutuar se si mund të thellojmë marrëdhëniet tona të veçanta në tregti, investime dhe siguri”, tha një zëdhënës i kryeministrit laburist.
Data e saktë e takimit ende nuk është bërë e ditur, por kryeministri britanik tha sot se siguria kombëtare e vendit të tij përballet me një sfidë brezash dhe se është thelbësore që e gjithë Evropa të shpenzojë më shumë për mbrojtjen.
“Ne po përballemi me një sfidë brezash përsa i përket sigurisë kombëtare,” u tha Starmer gazetarëve përpara se të nisej për në Paris. “Unë mendoj se ka edhe një pjesë më të madhe këtu, që është se kjo nuk ka të bëjë vetëm me vijën e frontit në Ukrainë. Kjo është vija e parë e Evropës dhe e Mbretërisë së Bashkuar. Kjo ka të bëjë me sigurinë tonë kombëtare dhe besoj se duhet të bëjmë më shumë”, tha ai.
Starmer ka thënë se është gati të dërgojë trupa paqeruajtëse britanike në terren në Ukrainë nëse arrihet një marrëveshje për t’i dhënë fund luftës me Rusinë.
Por një zëdhënës tha se Britania mund të dërgojë trupa vetëm nëse SHBA ofron garanci sigurie. Lloji i mbështetjes amerikane do të diskutohet kur Starmer dhe Trump të takohen në Uashington javën e ardhshme, tha zëdhënësi.
“Mbështetja e SHBA do të mbetet kritike dhe një garanci sigurie e SHBA është thelbësore për paqen e qëndrueshme,” tha ai.
