Kuvendi ka ankimuar në Komisionin e Ankimimeve dhe Sanksioneve (KAS) vendimin e Komisionit Qëndron të Zgjedhjeve, i cili bllokoi dy projekt-ligje të propozuara nga socialistët me arsyetimin se ndikojnë në zgjedhjet parlamentare të 11 Majit, pasi prekin politika të rëndësishme fiskale.
Më konkretisht bëhet fjalë për projekt-ligjet “Për tatimin mbi vlerën e shtuar” dhe “Për paketën e maleve”. Sipas Ilirjan Celibashit, votimi i këtyre dy projekt-ligjeve në Kuvend nuk respekton pikën 4 të nenit 91 të Kodit Zgjedhor, e cila më konkretisht thotë:
“Katër muaj para datës së zgjedhjeve deri në formimin e qeverisë së re pas zgjedhjeve ndalohet propozimi, miratimi ose nxjerrja e akteve ligjore ose nënligjore, të cilat parashikojnë dhënien e përfitimeve për kategori të caktuara të popullsisë, të tilla si aktet që parashikojnë rritjen e pagave, pensioneve, mbështetjes ekonomike apo sociale, uljen ose heqjen e taksave, vendosjen e amnistive fiskale, privatizimin apo dhënien e pasurive a të shpërblimeve, etj., përveçse kur nisma kushtëzohet nga gjendje të fatkeqësisë natyrore.”.
Por, socialistët pretendojnë të kundërtën dhe kërkojnë nga KAS shfuqizimin e këtij vendimi dhe lejimin e vijimit të procedurave parlamentare për shqyrtimin dhe miratimin e projekt-ligjeve në fjalë pa kufizime të pajustifikuara.
