“Shtetet e Bashkuara kanë kërkuar nga shtetet evropiane të tregojnë se çfarë mund të kontribuojnë në aspektin e garancive të sigurisë për Ukrainën”, tha presidenti i Finlandës, në mes të përpjekjeve diplomatike në rritje për të gjetur mënyra për t’i dhënë fund luftës trevjeçare me Rusinë.
Më herët, katër burime evropiane njoftuan se SHBA-ja kishte dërguar një dokument ku shtroheshin pyetje që përfshinin kontributet e mundshme të trupave në të ardhmen, me dy nga burimet që shtuan se ai ishte dërguar në fillim të kësaj jave, shkruan Reuters
“Amerikanët u kanë ofruar evropianëve një pyetësor”, tha presidenti finlandez Alexander Stubb në Konferencën e Sigurisë në Mynih.“Kjo do t’i detyrojë evropianët të mendojnë, pastaj u takon atyre të vendosin nëse ata i përgjigjen pyetësorit”, shtoi ai.
Financial Times fillimisht raportoi se Uashingtoni u kishte kërkuar aleatëve të tij evropianë që të siguronin informacion mbi armatimin, trupat paqeruajtëse dhe aranzhimet e sigurisë që mund të siguronin për Ukrainën.
“Ideja është dukshëm për të parë se si aleatët evropianë e shohin kornizën e mundshme për negociatat për t’i dhënë fund konfliktit dhe angazhimin e mundshëm të Evropës dhe Shteteve të Bashkuara”, tha një diplomat evropian në dijeni të dokumentit.
Raportohet se pyetësori përfshin gjashtë pyetje me nga një të veçantë për vendet anëtare të Bashkimit Evropian.
Ndryshe, presidenti ukrainas Volodymyr Zelensky bëri thirrje për krijimin e një ushtrie evropiane, duke argumentuar se kontinenti nuk mund të ishte më i sigurt për mbrojtjen nga Shtetet e Bashkuara dhe do të merrte respekt nga Uashingtoni vetëm me një ushtri të fortë.
