Udhëheqësi ukrainas Vladimir Zelensky është i etur për t’i dhënë fund armiqësive me Rusinë, ka deklaruar presidenti amerikan, Donald Trump. Ai shtoi se edhe presidenti rus Vladimir Putin do të donte të zgjidhte konfliktin.
Në një postim në platformën e tij “Truth Social” të mërkurën, Trump tha se “sapo foli” me Zelensky-n, duke shtuar se “ai, ashtu si presidenti Putin, dëshiron të bëjë PAQE”.
Shefi i Shtëpisë së Bardhë tha se një takim “do të mbahet të premten në Mynih”, me zëvendëspresidentin JD Vance dhe Sekretarin e Shtetit Marco Rubio që kryesojnë delegacionin amerikan. Ai tha se ka shpresë që negociatat do të japin rezultate “pozitive” .
“Zoti e bekoftë popullin e Rusisë dhe Ukrainës!” përfundoi Trump.
Më herët gjatë ditës, Putin dhe Trump zhvilluan një telefonatë, të cilën presidenti amerikan e përshkroi si “të gjatë dhe shumë produktive”. Të dy liderët prekën “përfitimet e mëdha që do të kemi një ditë duke punuar së bashku”.
