Ukraina ka pranuar aeroplanët luftarakë Mirage 2000 nga Franca, konfirmoi ministri francez i Forcave të Armatosura, Sebastien Lecornu.
Këta aeroplanë shënojnë llojin e dytë të aeroplanëve luftarakë perëndimorë në flotën ukrainase, pas F-16 që ishin dërguar vitin e kaluar. Sot janë publikuar edhe fotografitë e para të aeroplanëve francezë mbi Ukrainë.
Mirage 2000 francezë kanë arritur në Ukrainë me pilotët ukrainas pas disa muajsh trajnimi intensiv në Francë.
Ministria e Mbrojtjes e Ukrainës publikoi një fotografi të aeroplanëve Mirage 2000 me shenjat ukrainase, duke shoqëruar me mesazhin “Veç në Ukrainë”.
Dërgesa e parë përfshin tre aeroplanë të armatosur me raketa ajër-ajër, raketa kryesore Scalp dhe bomba të udhëzuara Safran AASM Hammer, raportoi La Tribune.
Këta aeroplanë gjithashtu janë të pajisur me topa 30 mm dhe nëntë mbajtëse të jashtme për armë. Lecornu kishte njoftuar në muajin tetor se Mirage 2000-5, të dizajnuar për superioritet ajror, do të ishte i modifikuar për luftë ajër-tokë dhe mbrojtje nga lufta elektronike.
Mirage 2000 ka fluturuar për herë të parë në vitin 1978 dhe u fut në shërbimin e forcave ajrore franceze në vitin 1984 si pjesë e mbrojtjes ajrore. Kompania Dassault Aviation prodhoi 600 njësi të këtij aeroplani, nga të cilat pothuajse gjysma janë eksportuar në tetë shtete, përfshirë Brazilin, Emiratet e Bashkuara Arabe, Greqinë dhe Tajvanin.
Aerooplani Mirage 2000 ka një peshë lufte prej 9.5 ton dhe mund të arrijë një shpejtësi më të madhe se 2.2 Mach. Ai mund të qëndrojë në pozita luftarake deri në 2 orë dhe 40 minuta në një distancë prej 241 kilometra detare nga baza e tij. Dassault Aviation ka njoftuar se ky aeroplan do të tërhiqet deri në vitin 2029, ndërsa versioni Mirage 2000 D do të tërhiqet deri në vitin 2035.
Shpenzimet operative për një orë fluturimi të Mirage 2000 janë rreth 17 mijë euro, sipas një raporti të Senatit francez, ndërsa për një orë fluturimi të F-16 shpenzimet janë rreth 26,927 dollarë.
