Dy vajzat që dyshohet se administronin një faqe online në rrjetin social ‘Instagram’, janë identifikuar më herët nga policia dhe arrestuar.
‘Laviret e Korçës’, ishte emërtimi i faqes që denigronte vajzat e reja të qytetit Juglindor, ndërsa sipas hetimeve, njëra prej vajzave është shtetasja E. P., e cila ka qenë përgjegjëse për aplikacionin “Tellonym”, një platformë anonime e lidhur me profilin në Instagram. Ndërkohë, administratorja kryesore e profilit rezulton të jetë vajza me inicialet P. M., e cila menaxhonte postimet dhe përmbajtjet e shpërndara në rrjetin social.
Në foton e mëposhtme është E. P., e cila shfaqet me kapuç dhe e veshur në mënyrë provokuese.
Ato dyshohen për përhapjen e materialeve me përmbajtje bullizuese dhe pornografike ndaj të miturve dhe akuzohen për veprën penale “Pornografi me të mitur”.
Për shkak të denigrimit të figurës së tyre, ka pasur edhe vajza që në pamundësi për të përballuar me ekspozimin e jetës private, kanë tentuar t’i japin fund jetës. Madje janë regjistruar jo një, por tre raste të tilla. Nuk dihen ende arsyet se pse dy vajzat autore degradonin deri në këtë pikë, por një gjë është e sigurt, Korçën e “kaploi” frika, pasiguria dhe terrori. Njëra prej tyre ka tentuar vetëvrasjen me thikë, një tjetër me ilaçe, ndërsa rasti i tretë është ndaluar në kohë nga familjarët.
Hetimet për këtë ngjarje nisën pas një denoncimi të bërë nga një oficere sigurie në një prej gjimnazeve të Korçës. Sektori Kundër Krimit Kibernetik në Policinë e Shtetit ndërmori menjëherë veprime për të zbuluar administratorët e faqes, e cila për një kohë të gjatë ka qenë aktive, duke postuar në mënyrë të përsëritur përmbajtje të dëmshme për adoleshentët e qytetit.
Në rrjetën e këtij sulmi kibernetik kanë rënë mbi 100 të rinj, kryesisht vajza, të cilat janë bullizuar publikisht, ndërsa në vetëm tre ditët e fundit janë identifikuar më shumë se 20 viktima.
