Policia e Elbasanit ka arrestuar një 44-vjeçar, pasi ka përplasur një këmbësor dhe një mjet bujqësor të parkuar dhe u largua nga vendngjarja.
Bëhet fjalë për Florenc Prroi, i cili përplasi një 56-vjeçar në fshatin Tregan, pasditen e djeshme, 6 shkurt. I dëmtuari ndodhet në spitalin e Traumës në Tiranë.
Gjithashtu në pranga ra Arben Beka, pasagjer në mjetin e drejtuar nga Florenc Prroi, duke qenë se nuk kallëzoi në polici aksidentin.
“Si rezultat i hetimeve dhe veprimeve policore, të kryera menjëherë pas aksidentit rrugor të ndodhur pasditën e djeshme, në fshatin Tregan, specialistët e qarkullimit rrugor identifikuan, lokalizuan dhe arrestuan drejtuesin e automjetit që shkaktoi aksidentin, shtetasin F. P., 44 vjeç.
Nga veprimet e deritanishme dyshohet se me automjetin që drejtonte në gjendje të dehur, 44-vjeçari ka përplasur këmbësorin, shtetasin F. K., 56 vjeç, dhe 1 mjet bujqësor të parkuar, dhe më pas është larguar nga vendi i aksidentit. 56-vjeçari aktualisht është në kujdesin e mjekëve, në Spitalin e Traumës.
Në vijim të këtyre veprimeve, u vu në pranga, për moskallëzim të krimit, shtetasi A. B., 55 vjeç, pasagjer në automjetin e 44-vjeçarit, në momentin e aksidentit”, thuhet në njoftimin e Policisë së Elbasanit.
Materialet procedurale iu referuan Prokurorisë së Elbasanit, për veprime të mëtejshme.
