Pas kthimit nga Gjermania, ku mori pjesë në kongresin elektoral të CDU-së, Sali Berisha ka mbajtur mesditën e kësaj të mërkure një konferencë me gazetarët.
Berisha është pyetur nëse a ka filluar lobimin për heqjen e “non gratës” nga SHBA, pas marrjes së detyrës nga presidenti amerikan Donald Trump, ku e ka mohuar diçka të tillë.
Lideri demokrat tha se po pret që të plotësohet administrata e re e Trump dhe më pas do t’i drejtohet për heqjen e “non gratës”.
“Jo, unë nuk e kam filluar lobingun sepse janë gjithsej 14 ditë që ka filluar administrata e re. Dhe unë nuk besoj që në ditët më të para të saj, të jetë përparësi ky problem. Kështu që unë jam i vetëdijshëm se duhet të plotësohet administrata, d.m.th është një proces konfirmimesh që duhet të kalojë në Kongres. Dhe procesi i konfirmimeve të zyrtarëve nuk ëshët vetëm për sekretarët e shtetit, por edhe për persona nën rangun e tyre. Unë pres që të plotësohet administrata e re dhe pa asnjë diskutim do i drejtohem administratës së re. I vetmi shkak që nuk i jam drejtuar është kjo. Dhe jam besimplotë sepse është kuptuar universalisht që ai ishte një akt politik i Xhorxh Sorosit dhe se Sekretari i Shtetit e ka bërë atë pa respektuar asnjë ligj të vendit të vet, pa asnjë dokument në dosje, thjesht me lobimin korruptiv të Xhorxh Sorosit.” – tha Berisha.
