Më 11 Mars do të mbahet seanca në Gjykatën e Lartë ku do të shqyrtohet rekursi i ish-deputetit Ervin Salianji. Ai u dënua me 1 vit burgim nga Gjykata e Apelit për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj.
Në shkresën e rekursit të bërë nga avokatët e tij më 3 Dhjetor, Salianji thotë se kundërshton vendimin e datës 18 dhjetor 2019 të Gjykatës Penale që vendosi për ish deputetin 1 vit burgim, por edhe vendimin e datës 26 shtator të Apelit të të Përgjithshëm, e cila la në fuqi vendimin e Shkallës së Parë.
Data e seancës në Gjykatën e Lartë është caktuar nga relatori i çështjes, gjyqtari Sokol Binaj.
Kujtojmë se nga shorti automatikisht pas regjistrimit të çështjes elektronik, relatore e çështjes u caktua Albana Boksi, por Gjykata e Lartë vendosi më pas si relator Sokol Binajn, për shkak se ka shqyrtuar më herët një rekurs të bërë nga Ervin Salianji për pezullimin e vendimit të Apelit. Ky ndërrim i relatorit të çështjes solli akuza nga Ervin Salianji dhe Partia Demokratike për manipulim të shortit.
Më 15 tetor, Gjykata e Lartë refuzoi një kërkesë të ish-deputetit demokrat Ervin Salianji, për pezullimin e dënimit me 1 vit burgim.
Ervin Salianji ndodhet prej 27 shtatorit të vitit të kaluar në burgun e Fierit. Vetë Ervin Salianji, por dhe Partia Demokratike e kanë konsideruar dënimin e Apelit për të si një hakmarrje politike të Edi Ramës dhe Fatmir Xhafajt dhe të pambështetur në prova dhe në ligj.
