Apeli i GJKKO-së ka rrëzuar kërkesën e ish-presidentit të Shqipërisë, Ilir Meta, i cili ka kërkuar shuarjen e masës së sigurisë ‘arrest me burg’, me argumentim se janë shkelur të gjitha afatet e paraburgimit.
Avokati mbrojtës i Metës, Kujtim Çakrani tha se gjykata nuk e ka arsyetuar aspak vendimin e dhënë duke shtuar se kjo krijon precedent të rrezikshëm për Metën.
“Se dimë çfarë vendimmarrje do marrë gjykata do e kalojë për gjykim apo do e kthejë për gjykim. Jemi në errësirë totalë sa i përket çështjes së zotit Meta.
Tha kam rrëzuar kërkesën, s’e dimë vendimin e arsyetuar. Ka krijuar precedent të rrezikshëm sot me zotin Meta.
Afati 1-vjeçar është ezauruar dje, dhe teknikalitetet që mund të gjejë gjykata për të justifikuar vendimin e saj. Nesër do shqyrtohet kërkesa për revokimin”, tha avokati Kujtim Çakrani.
Ilir Meta, ndodhet në qeli prej 21 tetorit 2024, pasi ndaj tij u ngritën akuza të rënda nga SPAK për pastrim parash, korrupsion pasiv të funksionarëve të lartë publikë dhe fshehje të pasurisë.
Hetimi ndaj Metës lidhet me aferën CEZ-DIA – një çështje që përfshin marrëdhëniet e kompanisë çeke CEZ me biznesmenin Kastriot Ismailaj – dhe me lobimet e ish-LSI-së në SHBA, për të cilat SPAK pretendon se janë përdorur fonde të padeklaruara me origjinë të dyshimtë.
Sipas hetimeve, Meta dyshohet se ka përfituar rreth 6.5 milionë euro nga afera CEZ-DIA dhe ka mosdeklaruar 400 mijë dollarë për lobime në Shtetet e Bashkuara. Prokuroria e Posaçme e ka marrë atë zyrtarisht të pandehur, së bashku me ish-bashkëshorten e tij, Monika Kryemadhi, që ndodhet nën masën e detyrimit për paraqitje.
Meta i ka cilësuar akuzat si politike dhe të orkestruara “me urdhër të Edi Ramës”, duke e akuzuar SPAK-un se është “organizatë në shërbim të verbër të qeverisë”.
