Tre persona janë arrestuar nga Policia e Tiranës, teksa akuzohen për shitje të lëndëve narkotike, por nuk kanë lidhje me njëri-tjetrin.
Më konkretisht, në pranga është vënë shtetasi G. Xh., 49 vjeç. Autoritetet raportojnë se gjatë kontrollit në banesën e tij, uniformat blu kanë gjetur një sasi lënde narkotike kanabisi dhe një sasi farash narkotike kanabis sativa.
Në pranga është vënë dhe shtetasi G. R., 26 vjeç. Blutë e kryeqytetit bëjnë me dije se gjatë kontrollit fizik, të riut i është gjetur një sasi lënde narkotike kanabisi, e cila i është sekuestruar në cilësinë e provës materiale.
Po ashtu, është arrestuar dhe shtetasi J. C., 34 vjeç, pasi gjatë kontrollit fizik i është gjetur një sasi lënde narkotike kokainë, e cila po ashtu i është sekuestruar në cilësinë e provës materiale.
Ata akuzohen për veprën penale “Prodhimi dhe shitja e narkotikëve”. Materialet procedurale i kaluan Prokurorisë së Tiranës për veprime të mëtejshme.
