Seanca e sotme plenare në Kuvend nisi me përplasje mes opozitës dhe mazhoranca, lidhur me futjen e disa ligjeve në rendin e ditës. Partia Demokratike akuzoi qeverinë se po i përdor këto ligje si aset elektoral për të marrë vota për zgjedhjet e 11 Majit.
Më konkretisht bëhej fjalë për zgjatjen e afateve për investimet stragtegjike, Paketa e Maleve dhe çështjeve të tjera, që deputetja Ina Zhupa i quajti klienteliste dhe me qëllime elektorale.
Madje Zhupa, akuzoi socialistët se kanë falsifikuar datën për paketën e maleve, duke shkelur kodin zgjedhor dhe duke e kaluar 4 muaj para zgjedhjeve.
“Po fusni në kalendar dhe projekt-program projektligje për qëllime elektorale. Po fusni projektligje e ligje për oligarkë dhe qëllime elektorale, për 100 grante elektorale si në rastin paketa e maleve, për Partinë Socialiste. Paketën e maleve e keni futur pa datë, kishit parashikuar një datë boshe 10 janar, por keni shkelur kodin zgjedhor, sepse keni falsifikuar datën dhe po e kaloni 4 muaj para zgjedhjeve. Po bëni aset elektoral, po kthehen deputetët për votën e PS-së. 100 grante parashikon paketa e maleve, që parashikon PS sepse do jetë në funksion të saj dhe mund ta quajmë “Rilindja e Maleve.
Ju nuk fusni ligje për mbrojtjen e qytetarëve, ligje për rastet e përmbytjeve, siç po ndodh edhe në Durrës. Për këto dhe të tjera u shprehëm kundër kalendarit në Konferencën e Kryetarëve. Na sillni shkresën e KQZ që ju lejon juve t’i fusni këto projektligje në kalendar për seancë. Në të kundërt janë ligje elektorale”, tha Zhupa.
Zhupës iu përgjigj kreu i grupit parlamentar të PS-së, Niko Peleshi, i cili deklaroi se ligjet nuk janë vetëm për një periudhë kohore dhe se janë për të gjithë shqiptarët.
“Është e qartë për të gjithë, parlamenti nuk bënë ligje vetëm për një pjesë të shqiptarëve apo vetëm për një parti, por ligjet janë për të gjithë. Ligjet nuk janë për një periudhë disa javore deri në zgjedhjet e ardhshme, nuk ka një tentativë të tillë. Ky argumentim është i tepër dhe nuk qëndron. Nuk ka ligj që futet befas në seancë dhe miratohet. Të gjithë ligjet kalojnë procedurën në komisione dhe nëse opozita do vërej ndonjë prej ligjeve element që bien ndesh me Kodin Zgjedhor natyrisht do mbahet qëndrimi në komision dhe nuk kemi pse paragjykojmë çdo hap dhe propozim që bëjmë. Paketa e Maleve nuk ka për qëllim të shpërndajë grante për socialistët e zonave malore, por i shërben të gjithëve. Kjo paketë është për t’u vënë në zbatim për një kohë të gjatë dhe jo vetëm para zgjedhjeve. Nuk është ligj për partinë, por për Shqipërinë”, tha Peleshi.
