Kuvendi i ka kthyer përgjigje Komisionerit Shtetëror të Zgjedhjeve, Ilirjan Celibashi, i cili i kërkoi të dinte se sa herë deputetët e Partisë Social Demokrate (PSD) së drejtuar nga Tom Doshi dhe Partisë Drejtësi Integrim dhe Unitetit (PDIU) të Shpëtim Idrizit kishin bashkuar votat me Partinë Socialiste në parlament.
Sipas shkresës së Kuvendit, rezulton se këto dy parti i kanë bashkuar votat 8 herë me socialistët për të miratuar programin politik të qeverisë në 16 shtator 2021 si edhe për votimin dhe miratimin e buxheteve nga viti 2021 deri në 2025.
Kjo kërkesë iu bë Kuvendit, pas denoncimit të Partisë Demokratike se Elisa Spiropali deklaronte se shumicë parlamentare ishte vetëm Partia Socialiste dhe të gjithë të tjerët ishin në opozitë, me qëllim që PD të ndante komisionerët në zgjedhjet parlamentare të 11 Majit me t gjitha partitë e tjera, ndërsa PS të ishte e vetme.
Tashmë, ndarja e komisionerëve nga KQZ-ja pritet të jetë: PS do të ndajë komisionerët me PSD-në e Tom Doshit, ndërsa PD-ja me Partinë e Lirisë dhe PDIU-në.
Përgjigjja e Kuvendit:
I nderuar zoti Komisioner
Në përgjigje të shkresës Suaj me nr. prot. 323, datë 17.1.2025 në të cilën kërkohet vënia në dispozicion e qëndrimeve të shprehura në votë të deputetëve të Partisë Socialdemokrate (PSD) dhe Partisë për Drejtësi, Integrim dhe Unitet (PDIU), në votëbesimin e qeverisë, ligjin e buxhetit, etj., gjatë periudhës së legjislaturës 2021-2025, Ju dërgojmë dokumentacionin arkivor si mě poshtë:-
-Procesverbalin për votimin e projektvendimit “Për miratimin e programit politik dhe përbërjes së Këshillit Ministrave”, datë 16 shtator 2021, bashkëlidhur dhe fletët e votimit.
-Procesverbalin për votimin në parim të projektligjit “Për buxhetin e vitit 2022”, bashkëlidhur edhe fletët e votimit.
-Procesverbalin për votimin në tërësi të projektligjit “Për buxhetin e vitit 2022”, bashkëlidhur edhe fletët e votimit.
-Përmbledhjen e rezultatit të votimit në parim të projektligjit “Për buxhetin e vitit 2023”.
Përmbledhjen e rezultatit të votimit në tërësi të projektligjit “Për buxhetin e vitit 2023”.
-Votimi në parim dhe në tërësi i projektligjit “Për buxhetin e vitit 2024” për shkak të situatës se krijuar gjatë seancës plenare u zhvillua me kartonë dhe nuk disponojmě votimin individual të deputetëve. —Bashkëlidhur procesverbali i seancës plenare të datës 7 dhjetor 2023 dhe procesverbali i seancës plenare të datës 21 dhjetor 2023.
-Përmbledhjen e rezultatit të votimit në parim të projektligjit “Për buxhetin e vitit 2025”. Përmbledhjen e rezultatit të votimit në tërësi të projektligjit “Për buxhetin e vitit 2025”.
