Artistja e mirënjohur shqiptare Parashqevi Simaku prej rreth dy javësh ndodhet e shtruara në një spital psikiatrik në New York të Shteteve të Bashkuara të Amerikës. Gjendja e saj duket se u rëndua pas takimit pas shumë vitesh me djalin e saj.
Biznesmeni Elton Ilirjani, i cili i ofroi mbështetje dhe strehim, ka zbuluar së fundmi se e ka takuar këngëtaren dhe gjendja aktuale e Parashqevi Simakut është shumë më mirë, në krahasim me ditën kur është paraqitur në spital.
Ndër të tjera, Elton Ilirjani ka treguar dhe se dy infermiere me origjinë shqiptare e kanë takuar Parashqevi Simakun në spital, me dashamirësi, por pa lejen e familjarëve. Biznesmi u ka bërë thirrje që kjo gjë të mos ndodhë më, pasi sipas tij, shkelet privatësia.
“Sapo kam dalë nga një takim me Parashqevi Simakun në spital dhe ajo ishte shumë më mirë se herët e tjera dhe vihet re ndryshimi i saj. Nuk është se është në momentin e saj më të mirë dhe çdo gjë do të jetë më mirë kur të lerë spital, por në krahasim me ditën e parë kur u paraqit në spital ajo është shumë më mirë. Për arsye që janë të kuptueshme, unë nuk kam ndarë me ju vendndodhjen e saj sepse familja ka zgjedhur që kjo është konfidenciale. Ajo më tha se dy infermiere me origjinë shqiptare e kanë takuar… më tha se ishin shumë pozitive dhe kishin dëshirë për ta ndihmuar, por kur fola me familjarët e saj të ngushtë ata nuk i aprovojnë këto vizita, për të ruajtur privatësinë e saj.
U bëj thirrje dy zonjave që të mos e takojnë më, dhe nga tani vizitat do të kontrollohen nga familjarët sepse është një shkelje e privatësisë së pacientit. E përsëris që Parashqevia më tha se takimi ishte dashamirës, por familjarët nuk i pranojnë. Nëse doni ta takoni duhet të kërkoni leje nga familjarët, djalit të saj, vëllait, nipit dhe mbesës. Në rast të kundërt do të marrim masa, dhe nuk do doja të kishim përplasje ligjore. Nuk do doja të isha në mes të kësaj situate, janë familjarët që vendosin dhe ne duhet t’i respektojmë ata. Këto janë çështje me shumë zarar dhe mund t’ju kushtojnë shumë. Ta mbyllim me diçka pozitive, Parashqevia po bëhet mirë dhe kam besim që për pak javë mund t’i kthehet jetës në shtëpi dhe gradualisht të rehabilitohet. Gradualisht aty do më lindë dhe mua puna që bashkë me të të bëjmë një art të jashtëzakonshëm bashkë”, shprehet Elton Ilirjani në rrjetet sociale.
