Çështja e ujësjellësit të Himarës, që i merr ujin lumit Shushica, është ende në gjyq, por kompania ka rinisur punimet duke dërguar tubat në territorin e Parkut Kombëtar të Vjosës. Punimet në terren ishin pezulluar për shkak të rezistencës së banorëve.
Prej më shumë se një viti banorët e 36 fshatrave buzë lumit Shushica, njohur dhe si lumi i Vlorës, kundërshtojnë projektin e ujësjellësit, i cili parashikon marrjen e ujit të lumit për t’ia dërguar zonës bregdetare.
Projekti u prit me protesta dhe një padi në gjykatë, të cilat çuan deri në pezullimin e punimeve, gjë që u cilësua fitore e vogël. Por, së fundmi, zbatuesit e projektit kanë nisur sërish punimet përgjatë rrjedhës së sipërme të Shushicës, ku po zhvendosin tubat që do të përdoren për të devijuar prurjet.
Më parë ato ishin stacionuar pranë vendgrumbullimit në urën e Laskos në Kuç. Kompania ndërtuese i la aty përballë kundërshtive të banorëve.
“Është e papranueshme që pavarësisht kundërshtimit të fuqishëm nga ana jonë si banorë të luginës së Shushicës, ky projekt të vijojë punënimet brenda Parkut Kombëtar të Vjosës. I bëjmë thirrje qeverisë të heqë dorë nga marrja e ujit të Shushicës për ujësjellësin e Himarës dhe të përdorë alternativa të tjera për realizimin e tij”, tha Astrit Balilaj, kryetar i fshatit Kuç.
Në qershor, të mbështetur nga EcoAlbania dhe Res Publica, 54 banorë paditën Këshillin e Basenit Vlorë, Agjencinë Kombëtare të Mjedisit (AKM) dhe Bashkinë Himarë.
Ky projket rrezikon të thajë shtratin e lumit Shushica dhe të lerë pa ujë banorët e 36 fshatrave buzë lumit të Vlorës, të cilët angazhohen kryesisht në bujqësi. Ende nuk ka një deklaratë publike nga qeveria në lidhje me vijimin e punimeve.
“Beteja për mbrojtjen e ujit të Shushicës vijon, tashmë edhe në gjykatë. Ne jemi të vendosur ta ndjekim këtë rast ne të gjitha instancat për të moslejuar këtë ndërhyrje shkatërruese në Parkun Kombëtar të Lumit të Egër Vjosa, e cila do të përbënte një precedënt të rrezikshëm për të ardhmen e parkut”, tha Olsi Nika, nga EcoAlbania.
Shushica rrjedh nga Mali i Thatë dhe Mali i Gjoshnikoshit në lindje të fshatit Kuç. Ky lum përshkon rreth 82 kilometra nga jugu në veri duke kaluar në mbi 30 fshatra e duke iu bashkuar Vjosës si një nga degët kryesore të saj. Në vitin 2023, rrjedha e Vjosës u shpall Park Kombëtar.
Me ndërtimin e ujësjellësit të Himarës, qeveria synon të devijojë ujin e burimit të Lëpushës (burimi i Shushicës) për ta çuar atë në bregdetin e Himarës në mënyrë që të përmbushë kërkesat e turizmit masiv atje.
Tubi prej 17 km nga Kuçi në Himarë është gati i përfunduar, megjithatë diga e devijimit, – infrastruktura më e rëndësishme në marrjen e ujit, – është akoma pa u ndërtuar.
Ekspertë nga organizatat mjedisore që janë rreshtuar krah banorëve, thonë se nëse ky projekt realizohet do të ketë dëme të mëdha në mjedis. Shushica ka qenë e rrezikuar dhe nga ndërtimi i 4 hidrocentraleve, betejë e cial është fituar nga banorët.
Shkalla e parë e Gjykatës Administrative shpalli vendimin në dhjetor për anulimin e kontratës që parashikonte ndërtimin e 4 hidrocentraleve. / Arbjona Çibuku / citizens.al /
