Brenda vetëm pesë ditësh, autostrada Lushnje-Tiranë është kthyer në një burim serioz rreziku për drejtuesit e mjeteve.
Dhjetëra makina kanë pësuar dëmtime, duke çarë gomat në një gropë të madhe që ndodhet në mes të rrugës, pranë fshatit Golem të Lushnjes. Gropa, që vazhdon të mbetet e paadresuar nga autoritetet përkatëse, përbën një rrezik të madh, veçanërisht për drejtuesit e motorëve, të cilët rrezikojnë edhe jetën e tyre.
Sipas banorëve dhe drejtuesve të mjeteve, policia ka mbërritur disa herë në vendngjarje pas telefonatave të qytetarëve që kanë pësuar dëmtime për shkak të gropës. Megjithatë, ndërhyrjet e Autoritetit Rrugor Shqiptar (ARSH) nuk kanë zgjidhur problemin. Banorët raportojnë se ARSH-ja ka hedhur vetëm çakull mbi gropën, një zgjidhje që ka rezultuar e përkohshme. Sipas tyre, çakulli qëndron vetëm për një ditë, dhe më pas gropa rihapet, duke rikthyer rrezikun.
Gropa në mes të rrugës nuk është vetëm një kërcënim për automjetet, por një rrezik edhe më i madh për drejtuesit e motorëve, të cilët përballen me mundësinë e aksidenteve të rënda. Drejtuesit e automjeteve dhe banorët kërkojnë një zgjidhje të qëndrueshme dhe ndërhyrje të menjëhershme nga autoritetet për të shmangur tragjedi të mundshme.
Mesazhi i Qytetarit për JOQ: “Brenda 5 ditësh në autostradën Lushnje-Tiranë janë me dhjetëra makina që kanë çarë gomat e tyre në një gropë të madhe në mes të rrugës, pranë fshatit Golem të Lushnjes. Ka ardhur edhe policia disa herë pas telefonatave të personave që kanë pësuar dëmtim nga ajo gropë. ARSH-ja është hera e dytë që vjen dhe hedh vetëm çakull, por çakulli qëndron vetëm një ditë. Është një rrezik i madh, sidomos për motorët që rrezikojnë edhe jetën.”
