Numri i të vdekurve nga zjarri në resortin e skive Kartalkaya në provincën Bolu në Turqinë veriore është rritur dhe ka shkuar në 76 , tha ministri i brendshëm turk Ali Gerlikaya.
Raporti i mëparshëm i viktimave fliste për 66 të vdekur dhe 51 të plagosur.
Ministri i Brendshëm tha gjithashtu se nëntë persona janë arrestuar në lidhje me zjarrin. Mes të arrestuarve është edhe pronari i resortit.
Presidenti Rexhep Tajip Erdogan shpalli më herët ditë zie kombëtare. Në deklaratat e tij pas mbledhjes së Këshillit të Ministrave, në Ankara, ai tha se ka nisur një hetim gjyqësor dhe administrativ për shkaqet e zjarrit.
Ai tha se për mbarëvajtjen e hetimeve janë caktuar gjashtë prokurorë, dy inspektorë të Administratës Publike, katër inspektorë të Ministrisë së Punës dhe një komision prej pesë anëtarësh ekspertësh.
Në vendngjarje kanë shkuar edhe katër ministra të qeverisë.
Reagimi i presidentit Bajram Begaj për tragjedinë në Turqi
Presidenti i Republikës, Bajram Begaj, ngushëlloi sot familjarët e viktimave të shkaktuar nga zjarri në një resort turistik në Bolu të Turqisë.
Kreu i Shtetit i përcolli homologut të tij turk Erdogan dhimbjen për këtë ngjarje të rëndë si edhe mbështetjen e popullit shqiptar në këto momente të vështira.
“Jemi thellësisht të pikëlluar nga aksidenti tragjik në Bolu, Turqi. Në emër të Shqipërisë shpreh ngushëllimet e mia të përzemërta dhe të popullit shqiptar për familjet e viktimave dhe i uroj të lënduarve shërim të shpejtë. Mendimet tona janë me Presidentin @RTERdogan dhe popullin turk në këtë kohë të vështirë.”- shkroi në llogarinë e tij në X Presidenti Begaj.
