35-vjeçari Fabian Dodaj, nga Shkodra, është shpallur në kërkim nga hetimi i krimit kibernetik në policinë e Lezhës pasi është kallëzuar nga një 33-vjeçare. Dodaj ka hapur një llogari në “TikTok” nëpërmjet së cilës fyen atë dhe familjarë të saj.
“Specialistët e Seksionit për Hetimin e Krimeve Kibernetike shpallën në kërkim shtetasin F. D., 35 vjeç banues në Shkodër, pasi ka kallëzuar një 33–vjeçare, se ky shtetas ka hapur një llogari në “TikTok”, nëpërmjet së cilës fyen atë dhe familjarë të saj. Punohet për lokalizimin dhe kapjen e 35–vjeçarit, si dhe për verifikimin e këtij kallëzimi.”– njofton policia.
Kujtojmë se ky nuk është rasti i parë, dhe mesa duket as i fundit, që vajzat shqiptare bien pre e manjakërisë së një të burgosuri ndaj të cilit nuk merret asnjë masë.
Jo më larg se në gusht të vitit që lamë pas, me anë të një njoftimi, policia e Tiranës tha se në bashkëpunim me autoritetet ligjzbatuese franceze, kanë dokumentuar 62 raste të përndjekjeve dhe krimeve kibernetike online, që janë kryer nga shqiptari që vuante dënimin me burg në Francë.
Fabian Dodaj, ndërhynte në profilet e rrjeteve sociale (kryesisht Tik Tok dhe Instagram) të vajzave të ndryshme dhe pasi merrte fotografi nga profilet e tyre, i publikonte ato në profile false të krijuara prej tij, duke vendosur përshkrime denigruese.
Autori më pas i shantazhonte këto shtetase, duke i kërkuar fotografi dhe video intime në këmbim të fshirjes së materialeve të publikuara prej tij.
Po ashtu, vetëm pak muaj më parë, disa vajza të shqetësuara që fotot e tyre po keqpërdoreshin dhe po kërcënohedhin e denigroheshin vazhdimisht nga Fabian Dodaj, e denoncuan rastin në emisionin investigativ “Piranjat”.
Por siç duket, duhet që, largqoftë, ndonjë nga vajzat të ndërmarrë aktin e rëndë dhe të vetëvritet që institucionet të kthejnë sytë nga manjaku që po shkatërron jetë njerëzish.
Edhe pse me dhjetra denoncime, Fabian Dodaj vijon të bëjë si hamshor nga burgu i Francës dhe ndërron celularë të ndryshëm brenda qelisë “luksoze”, ndërsa policia shqiptare bën sehir.
