Janë zbardhur detaje të reja nga hetimet për atentatin e regjistruar mbrëmjen e 12 Janarit tek “Pallati me Shqigjeta” në Tiranë, ku u ekzekutua 56-vjeçari Bujar Nasufi.
Burime për mediat bëjnë me dije se Policia ende nuk ka rënë në gjurmët e autorit, por nga hetimet paraprake dyshohet se ngjarja mund të ketë ndodhur për konflikte pronësie.
Nga kqyrja e shumë kamerave të sigurisë, burime bëjnë me dije se ka rezultuar se autori është nisur nga një zonë e Kombinatit për në Selitë e vogël, aty ku edhe ekzekutoi 57-vjeçarin Bujar Nasufi. Nga hetimet ka rezultuar e vrasësi e ka pritur mbi 15 minuta Bujar Nasufin, i fshehur në një rrugicë pranë banesës së viktimës.
Vrasësi ka qenë i maskuar me kapuç dhe ka pritur që nga makina e viktimës të dilte bashkëshortja e tij dhe më pas është afruar drejt shënjestrës duke e qëlluar me një armë zjarri të shkurtë (MP5).
Policia dyshon se autori e njihte shumë mirë zonën, pasi në çdo lëvizje që ka bërë nuk ka përdorur rrugën kryesore, por vetëm rrugica alternative. Edhe kur është larguar me motor, ai ka përdorur një rrugicë shumë pranë vendit ku kreu ekzekutimi dhe më pas ka dalë në Kodër Sharrë, ku dogji motorin, shumë pranë zonës nga ku u nis, Kombinati.
Pak ditë më parë janë rimarrë në pyetje sërish familjarët e të ndjerit, ku janë pyetur lidhur me konfliktet e mundshme që mund të ketë pasur viktima.
