Më shumë se 500 000 fëmijë në Afganistan rrezikojnë të vdesin nga kequshqyerja në 2025, paralajmëruan Kombet e Bashkuara. Në një deklaratë, OKB-ja tha se ndryshimet ekstreme klimatike, kanë kufizuar aftësinë e njerëzve për të ushqyer familjet e tyre.
Sipas një raporti të fundit nga Zyra e OKB-së për Koordinimin e Çështjeve Humanitare (OCHA), gati gjysma e popullsisë së Afganistanit – rreth 22,9 milionë njerëz – do të ketë nevojë për ndihmë humanitare këtë vit – për të adresuar nevojat kronike dhe akute.
“Ekonomia e brishtë e Afganistanit, fatkeqësitë natyrore të vazhdueshme dhe goditjet e shkaktuara nga klima, së bashku me paqëndrueshmërinë politike rajonale, vazhdojnë të pengojnë rimëkëmbjen pas disa dekadash konfliktesh”, thuhet në raport.
Që nga kthimi i talebanëve islamikë në pushtet në gusht 2021, Afganistani nuk ka akses në rezervat e veta valutore në bankat perëndimore – duke e përkeqësuar krizën ekonomike të vendit.
Sipas OKB-së, papunësia dhe varfëria prekin rreth 48% të popullsisë. Vendi mbetet i prekshëm ndaj fatkeqësive që lidhen me klimën.
Përmbytje më të mëdha parashikohen në vitin 2025, të cilat si vitet e mëparshme, pritet të shkatërrojnë shtëpitë, tokat bujqësore dhe të zhvendosin komunitetet, duke përkeqësuar situatën, tashmë të rëndë humanitare.
