Kohë më parë emisioni “Stop” në Tv Klan ka transmetuar problemin e zonjës Dafina Peci, banore e fshatit Gjinar në Elbasan, e cila denoncoi ish-gjyqtaren e Elbasanit, Pajtime Fetahu. Sipas saj, gjyqtarja ka falsifikuar një vendim, duke rritur në mënyrë fiktive sipërfaqjen e tokës së saj në Gjinar. Për të njëjtën çështje, Pajtime Fetahu kishte dhënë dy vendime identike, por me sipërfaqje toke të ndryshme.
Avokati Çlirim Gjata, tha se është absurde të ketë dy vendime në këtë mënyrë.Prokurorja e Elbasanit, Enkeleida Millonai ia mbylli çështjen gjyqtares Fetahu, duke e nxjerrë pa lagur këtë të fundit. “Stop” kërkoi një kopje të regjistrit të dispozitivëve, regjistër ku shënohen të gjitha vendimet e gjykatës. Në kopjen e këtij regjistri rezultoi se vendimi ka 312.4 dhe jo 383.4 dynymë tokë, provë e pakontestueshme që tregon falsifikimin e gjyqtares Fetahu.
Sot në 2025-ën pronat në fshatin Gjinar të Elbasanit, përfituar nga Petër Topi, shumica janë shitur e tjetërsuar. “Stop” shkon në Gjinar për të vërtetuar këtë fakt nga banorët e prekur nga vendimi i falsifikuar i Pajtime Fetahut.
Në një tjetër rast Besim Debrova denoncon sesi në mënyrë të çuditshme i zhduket toka e trashëguar nga stërgjyshi, rreth 7 dynymë në Elbasan duke falsifikuar origjinën e pronës në K.K.P Elbasan. Edhe në këtë rast është përfituar pronë në mes të qytetit të Elbasanit, vend që njihet si tregu i Pajtime Fetahut.
Këtë e dëshmojnë edhe qytetarët që njohin si pronare Pajtime Fetahun e jo vëllezërit e saj.
Qytetarja: Përshëndetje! Të të pyes pak, ky tregu i Pajtime Fetahut, di gjë ku është? Tregu i Pajtime Fetahut.
Qytetari2: I shikon ato të bardhat aty? Do të marrësh rrugën drejt përpara, në fund fare do të marrësh djathtas. Është në fund, por në këtë orar nuk mund të gjesh.
Qytetarja: E kuptoj.
Qytetari2: Është në fund, mbrapa parkut.
Qytetari 3: Do të ikësh drejt. Do dalësh në një rrugë…
Qytetarja: Ku është ky tregu i Pajtime Fetahut?
Qytetari 4: Më sipër, në fund të rrugës, majtas.
Edhe kjo pronë është grabitur mbi bazën e dokumentave të falsifikuar nga ish-gjyqtarja e Elbasanit dhe Prokuroria Elbasan nuk ka nisur një hetim duke nisur me bllokimin e kësaj pasurie për të provuar sesi janë bërë pronarë dy vëllezërit e ish-gjyqtares për pronën mbi 2500 m2 vetëm për 8 milionë lekë të vjetra. Edhe këtu, tregtarët njohin si pronare Pajtime Fetahun dhe jo vëllezërit e saj.
Qytetari: Ky është tregu i Pajtimes?
Tregtari: Jo, matanë.
Qytetari: Është ai në fund fare?
Tregtari: Ëhë! Ja ku janë llamarinat.
Qytetari: Këtu është tregu i Pajtimes se këtu më thanë mua?
Tregtari: Këtu, këtu.
Qytetari: Ky është ë?
Tregtari: Ky!
Qytetari: A është tregu i Pajtimes ky?
Tregtari: Ëhë!
Qytetari: I asaj gjyqtares se më thanë këtu gjendet.
Tregtari: Ëhë…
Qytetari: Ky këtu është tregu i asaj gjyqtares, Pajtimes, si e ka ajo?
Tregtarja: Janë të vëllezërve!
“Stop” interesohet pranë Prokurorisë Elbasan nëse organi ka regjistruar procedimet penale për denoncimet e bëra më parë. Tashmë organi konfirmon se ka regjistruar procedimet për dy rastet e hetuara për ish-gjyqtaren, Pajtime Fetahu.
