Deputetja demokrate Ina Zhupa ka garantuar çdo shqiptar, që pas 11 majit do të marrë fund praktika e koncesioneve në trashëgiminë kulturore.
Përmes një deklarate për mediat, nga qyteti antik i Butrintit, Zhupa ka theksuar se Partia Demokratike do të bëjë gjithçka për të mbrojtur identitetin dhe historinë me çdo kusht.
Zhupa u shpreh se do të ndjekin standardet e UNESCO-s, duke mbrojtur identitetin dhe historinë, duke vënë theksin edhe një herë se tashmë nuk ka asnjë privat që do të vër duart në identitetin dhe historinë e shqiptarëve.
“Ndodhem në qytetin antik të Butrintit, një betejë disa vjeçare e Partisë Demokratike për të mbrojtur identitetin, historinë e shqiptarëve.
Jam këtu për të garantuar çdo shqiptar, që pas fitores së 11 majit, Partia Demokratike garanton që do të marrë fund praktika e koncesioneve në trashëgiminë kulturore.
Nuk ka më asnjë privat që do të vër duart në identitetin dhe historinë e shqiptarëve.
Ne do ta mbrojmë historinë dhe identitetin me cdo kusht.
Ne do të bëjmë gjithçka, që Butrinti po dhe çdo site tjetër i trashëgimisë kulturore, të zbatojë standardet më të larta të UNESCO-s dhe UNESCO të jetë guida dhe partneri jonë më i rëndësishëm.
Të gjitha fondacionet, të gjitha organizatat të kenë mundësi të japin donacione, të monitorojnë paratë e tyre, por asnjëra, asnjëherë, nuk mund të shtijë në dorë pasurinë kombëtare të qytetarëve shqiptar.
Ne jemi krenar për historinë tonë, për identitetin tonë, dhe do të bëjmë gjithçka që ta lartësojmë dhe ta mbrojmë atë.
Ne jemi shqiptar dhe Shqipëria është detyrimi që i kemi fëmijëve tanë për ta mbrojtur dhe për ta lartësuar”, tha Zhupa.
