Policia e Tiranës ka publikuar pamjet nga një prej apartamenteve në zonën e Astirit, ku dyshohet se është mbajtur e mbyllur vajza 21-vjeçare Sajma Q. nga 5 persona, e cila ditën e djeshme alarmoi autoritetet.
Siç shihet edhe në video, sipër tavolinës shihen dy armë zjarri pistoleta, të cilat dyshohet se iu përkasin 5 personave të shpallur në kërkim. Armët janë dërguar në laboratorin e Policisë Shkencore, ku do t’iu nënshtrohen ekspertizës për të bërë të mundur identifikimin e shenjave të gishtërinjëve.
Po ashtu, shihet edhe një pjatë së bashku me një kartë ID, ku dyshohet se personat që kanë qenë në aprtament kanë konsumuar lëndë narkotike kokaine, teksa shihen edhe mbetje të konsumit të cigareve dhe pijeve alkoolike.
.
Pas hetimeve, Policia ka identifikuar dhe shpallur në kërkim 5 persona, më konkretisht shtetasit: S. S., 29 vjeç, A. A., 36 vjeç dhe O. A., 31 vjeç, të tre banues në Tiranë; Joni Sadikaj, 26 vjeç, banues në Tepelenë; dhe A. J., 40 vjeç, banues në Vlorë.
Sipas Policisë, 5 djemtë e shpallur në kërkim në bashkëpunim me njëri-tjetrin e kanë mbajtur të mbyllur vajzën brenda apartamentit të marrë me qira.
Ata akuzohen për veprat penale “Heqja e paligjshme e lirisë”, kryer në bashkëpunim, “Mbajtja pa leje dhe prodhimi i armëve, armëve shpërthyese dhe e municionit” dhe “Falsifikimi i dokumenteve”.
Autoritetet policore vijojnë hetimet në bashkëpunim me Prokurorinë, për dokumentimin e plotë të ngjarjes dhe identifikimin e shtetasve të tjerë që mund të jenë përfshirë.
Kujtojmë se telefonata e vajzës në sallën operative të Policisë së Shtetit, ndodhi rreth orës 14:00 të ditës së djeshme dhe tha se ishte dhunuar nga disa persona brenda një apartamenti në katin e 8-të. Por, kur uniformat blu mbërritën në vendin e ngjarjes, vajza Sejma Q. nuk pranoi ta hapte derën, madje edhe pas negociatave me prindërit e saj, të cilët shkuan në ndihmë të Policisë.
Kjo solli që forcat RENEA të ndërhynin nga ajri, ku u lëshuan me litar nga tarraca e pallatit dhe u futën që nga ballkoni dhe dritarja e apartamentit dhe më pas hapën derën. Vajza është konstatuar e vetme në apartament në gjendje të rënduar psikologjike, teksa sipas Policisë së Tiranës, nga kqyrja fizike nuk janë konstatuar shenja dhune.
Uniformat blu kanë ushtruar kontroll edhe në apartament përballë apartamentit ku ndodhej vajza e ngujuar dhe aty kanë gjetur dy armë zjarri pistoletë. Burime për mediat bëjnë me dije se sipër tavolinës janë konstatuar mbetje lënde narkotike kokainë.
Një prej apartamenteve ishte marrë me qira nga një prej personave të shpallur në kërkim që prej muajit nëntor, ndërsa apartamenti tjetër ishte marrë me qira ditore ditët e fundit.
Një prej të shpallurve në kërkim, Joni Sadikaj rezulton se ka qenë i dashuri i vajzës, protegoniste të ngjarjes, ku mësohet se ata janë njohur në një lokal të njohur në zonën e Astirit, ku punonte e reja.
Joni Sadikaj, është emër i njohur për policinë. Në vitin 2017, ai u arrestua bashkë me 2 djem të tjerë në Kavajë në tentativë për të trafikuar 1.3 ton kanabis drejt Italisë. Ne atë kohe, ai u hetua nga ish-Prokuroria e Krimeve të Rënda dhe mohoi akuzat ndaj tij. Edhe në vitin 2022 Joni Sadikaj u arrestua pasi iu gjet me vete një armë pa leje, një krehër si dhe municion luftarak.
