Dritan alias Gramoz Rexhepi, një prej emrave më të shumëkërkuar në Europë, pritet të esktradohet ditën e sotme nga Turqia në Shqipëri. Lajmin e ka bërë me dije Policia e Shtetit përmes një komunikate të shkurtër për mediat, teksa nuk dihet ora se kur ai do të mbërrijë në aeroportin e Rinasit.
“Si rezultat i bashkëpunimit ndërmjet Interpol Tiranës dhe homologëve në Turqi, pritet që ditën e sotme, të ekstradohet në Shqipëri, shtetasi i shumëkërkuar Dritan Rexhepi alias Gramos Rexhepi.
Ora e mbërritjes së këtij shtetasi do t’ju njoftohet në vijim, ndërsa informacioni i detajuar për të, bashkëlidhur me pamje filmike, do t’ju vihet në dispozicion pas mbërritjes së tij në Rinas.” – thuhet në njoftimin e Policisë.
Dritan Rexhepi akuzohet nga drejtësia shqiptare për veprat penale “Rrëmbimi ose mbajtja peng e personit” dhe “Trafikimi i narkotikëve”, ku akuzohet si porositësi në rrëmbimin e Jan Prengës. Po ashtu, ai është dënuar nga Gjykata e Fierit me 4 vite burg për veprat penale “Falsifikimi i letërnjoftimeve, i pasaportave ose vizave”, në rrethana rënduese dhe “Falsifikimi i vulave i stampave ose formularëve”.
Gjithashtu, Dritan Rexhepi ishte i shpallur në kërkim dhe nga autoritetet italiane, pasi akuzohet si kreu i kartelit të drogës “Kompania Bello”, që transportonte kokainë nga Amerika e Jugut drejt Evropës.
Ndërkohë, Gjykata e Apelit Firence në Itali, me vendimin e datës 15 Prill 2010, e ka dënuar atë me 16 vjet e 5 muaj burgim (pjesa e mbetur e dënimit 13 vjet, 8 muaj e 6 ditë burgim), për veprën penale “Grup kriminal me qëllim trafikimin e narkotikëve”.
Dritan Rexhepi alias Gramoz Rexhepi u arrestua në muajin Nëntor të vitit 2023 në vilën e tij luksoze në Stamboll, në kuadër të operacionit të emëruar “Kartel”, pas bashkëpunimit të autoriteteve turke me ato italiane, por dhe ato shqiptare.
Pas procedurave gjyqësore, Dritan Rexhepi vendosi të ekstradohej në Shqipëri, Ai ka jetuar për një periudhë edhe në Ekuador, ku ka qenë dhe i burgosur aty, nga ku dyshohet se urdhëroi edhe rrëmbimin e Jan Prengës.
Jan Prenga u rrëmbye në Kamëz në Janar të vitit 2020 për shkak se i vëllai i tij dyshohet se kishte vjedhur një sasi droge në portin e Portsmuth në Angli. Për shkak të dhunës se ushtruar në automjetim tip “Range Rover” ai humbi jetën rrugës për në resortin e Altin Hajrit në Shijak, aty ku nga pamjet filmike duket i pajetë. Trupi i Prengës nuk është gjetur as sot e kësaj dite.
