Nga Boldnews.al
Qeveria ka vendosur t’i kufizojë ndjeshëm një ndër kompetencat kryesore të pushtetit të kryebashkiakut të Tiranës, Erion Veliaj, atë të dhënies së lejeve të ndërtimit, duke e detyruar që, për çdo godinë të re që do të ngrihet në pjesën më të madhe të kryeqytetit, të marrë më parë viston e Ministres së Infrastrukturës, Belinda Balluku dhe vartësve të saj.
Ky kufizim është bërë nëpërmjet një Vendimi të Këshillit të Ministrave të miratuar dy javë më parë, me propozim të Ballukut si ministre dhe të nënshkruar po prej saj, në cilësinë e zëvendëskryeministres.
Formalisht, ky vendim lidhet me krijimin e sigurisë së zonës aeroportuale, por, në praktikë, është një goditje e radhës që Balluku i jep “kundërshtarit” të saj brenda Partisë Socialiste, Erion Veliajt.
Në 18 Dhjetor 2024, Këshilli i Ministrave miratoi vendimin nr. 784, me titull “Për përcaktimin e rregullave për zhvillimin e zonave aeroportuale”.
Bazuar në këtë vendim, krijohet një “zonë e mbrojtur e aeroportit, e cila nënkupton një hapësirë që shtrihet në një rreze prej 15 kilometrash nga pika e referimit”.
Vendimi i qeverisë është shoqëruar edhe me një hartë që përcakton “zonën e mbrojtur” rreth aeroportit të Rinasit, e cila përfshin në perimetrin e saj hapësira nga Kruja, Durrësi, Kamza dhe më shumë se gjysmën e Tiranës.
Vendimi parashikon që strukturat kryesore përgjegjëse për zbatimin dhe mbikëqyrjen e rregullave në zonën e mbrojtur të aeroportit janë ministria përgjegjëse për transportin ajror, pra Ministria e Infrastrukturës e Ballukut dhe institucioni vartës i saj, Autoriteti i Aviacionit Civil.
“Boldnews.al” konsultoi distancat nëpërmjet programeve kompjuterike dhe rezultoi se, më shumë se gjysma e Tiranës, ka një largësi maksimale deri në 15 kilometra, duke u përfshirë kësisoj në “zonën e mbrojtur aeroportuale”.
Në këtë hapësirë përfshihet e gjithë zona perëndimore e qytetit deri, më së paku në qendër të Tiranës, si edhe shumë zona të tjera, ndër të cilat Selita, Farka e Vogël, Bulevardi i Ri (tek ish-stacioni i Trenit), zona e Liqenit të Thatë e më gjerë.
Praktikisht, “zona e mbrojtur aeroportuale” përfshin edhe atë që konsiderohet si “zemra ekonomike” e Tiranës, e parapëlqyer për leje ndërtimi nga kryebashkiaku, Erion Veliaj.
Vendimi i Këshillit të Ministrave parashikon kufizime në dhënien e lejeve të ndërtimit nga kryetari i Bashkisë në këto hapësira, ose, më së paku, miratimin e tyre, vetëm pasi të kenë kaluar “testin e sigurisë” pranë Autoritetit të Aviacionit Civil.
“Çdo objekt apo strukturë e planifikuar për ndërtim apo instalim në zonat e mbrojtura të aeroportit duhet që të marrë, sipas rastit, miratimin ose pëlqimin nga Autoriteti i Aviacionit Civil (AAC)”, thuhet në pikën 8 të këtij vendimi të qeverisë.
Më tej, vendimi i propozuar dhe i nënshkruar nga Belinda Balluku, në pikën 9 të tij, thotë: “Objektet, strukturat apo instalimet do t’i njoftohen AAC-së, në lidhje me lartësinë, koordinatat dhe strukturën apo llojin e ndërtimit”.
Jo vetëm kaq, por Autoriteti i Aviacionit Civil, nën varësinë e Ballukut, ka të drejtën që edhe të bllokojë lejet e ndërtimit të dhënë nga kryetarët e Bashkive të zonave të “sigurisë aeroportuale”, përfshirë edhe Veliajn.
“Autoriteti i Aviacionit Civil përcakton nëse objektet apo strukturat e planifikuara për ndërtim apo instalim në zonat e mbrojtura janë objekte të rrezikshme, për shkak të vendndodhjes, lartësisë ose mungesës së shënimit apo ndriçimit të tyre. …”.
Me anën e këtij vendimi, praktikisht, Belinda Balluku merr kontrollin mbi lejet e ndërtimit që duhet të japë Erion Veliaj, duke i hequr nga dora armën më të fortë të pushtetit politik të kryebashkiakut të Tiranës.
