Gjykata e Durrësit ka caktuar ditën e sotme masën e sigurisë “Arrest në burg” për 39-vjeçarin Fatjon Janina, i cili akuzohet për vrasjen e fqinjit të tij, Paulin Gina, 82 vjeç, i cili pasditen e 30 Dhjetorit u gjet i masakruar në banesën e tij.
Mbi Fatjon Janinën rëndojnë akuzat për veprat penale “vrasje me dashje” dhe “prodhimi, mbajtja, blerja apo shitja pa leje etë armëve të ftohta”.
I pyetur nga gjyqtari Rexhep Bekteshi rreth motivit të krimit, 39-vjeçari mbajti të njëjtin version siç kishte thënë edhe përpara grupit hetimor në momentet e arrestimit të tij.
Sipas tij, viktima, Paulin Gila, i kishte borxh 200 mijë lekë të vjetra dhe nuk ia kthente. 82-vjeçari jetonte i vetëm në apartamentin e tij, ku edhe u gjet i vdekur në lagjen 16 të qytetit bregdetar.
Gjatë kontrollit të ushtruar në banesën e 39-vjeçarit, uniformat blu gjetën dy thika, një çekiç dhe veshjet që dyshohet se ka patur autori gjatë kryerjes së krimit. Thika, çekiçi dhe veshjet me njolla gjaku janë dërguar në Institutin e Policisë Shkencore, për ekzaminime të mëtejshme.
Fation Janina, pasi ka kryer krimin, ka mbyllur me çelës derën nga jashtë, ka fshehur mjetet me të cilat kreu vrasjen dhe më pas është larguar.
Mbyllja e derës ka çuar policinë në dyshimet se autori ka qenë person që njihet me viktimën. Sapo kanë nisur hapjet e kamerave të sigurisë së një karburanti aty ngjitur, është konstatuar lëvizja e fundit e viktimës dhe hyrjet dhe daljet e vetme që kanë ndodhur në pallat gjatë kësaj fashe orare.
Nga hyrjet dhe daljet janë konstatuar vetëm lëvizjet e fqinjëve. Në kushte të tilla ka nisur marrja në pyetje e tyre dhe janë ushtruar kontrolle në banesa. Pasi kanë siguruar informacione nëpërmjet rrugëve operative dhe i kanë bashkëngjitur dhe hetimet që janë bërë, blutë e qytetit kanë konstatuar armët e krimit në banesën e Fation Janinës.
Kujtojmë se i moshuari kishte prerje me thikë në fyt, si dhe dëmtime të shumta në fytyrë, që siç duket autori e ka goditur dhe me thikë dhe me çekiç, teksa ende nuk dihet motivi i krimit.
Paulin Gina kishte humbur kontaktet me familjarët, pasi këta të fundit tentonin që të komunikonin me të në telefon, por i moshuari nuk iu përgjigjej. Më pas mësohet se familjarët kanë telefonuar një fqinj të tijin, i cili iu ka thënë se nuk e kishte parë.
Të alarmuar familjarët kanë bërë kallëzimin në Polici, dhe pasi uniformat blu shkuan në vendin e ngjarjes, hapën derën me forcë dhe janë ndeshur me skenën e krimit të rëndë.
