Një qytetare është drejtuar në “Stop” në Tv Klan me ankesën lidhur me ilaçin Viread që trajton hepatitin B. Ajo shprehet se më parë këtë ilaç e merrte me 112 mijë lekë të vjetra në farmacinë e spitalit. Por prej pesë muajsh e merr me 135 mijë lekë të vjetra. Ajo thotë se po abuzohet me çmimet e ilaçeve.
“Stop” bën një vëzhgim në 8 farmaci në kryeqytet dhe nuk e gjen këtë medikament.
Farmacia 1
Qytetarja: Të lutem, e keni këtë ilaçin?
Farmacistja: Viread? Jo!
Farmacia 2
Qytetarja: Të lutem, e keni këtë ilaçin?
Farmacisti: Jo!
Farmacia 3
Qytetarja: Si jeni? E keni këtë ilaçin, të lutem?
Farmacistja: Jo! Nuk e kemi pasur ndonjëherë.
Farmacia 4
Qytetarja: E keni këtë ilaçin, të lutem?
Farmacia: Jo, nuk e kemi.
Farmacia 5
Qytetarja: E keni këtë ilaçin, të lutem?
Farmacistja: Nuk e kemi pasur asnjëherë.
Farmacia 6
Qytetarja: E keni këtë ilaçin, të lutem?
Farmacistja: Jo, jo!
Farmacia 7
Qytetarja: E keni këtë ilaçin, të lutem?
Farmacistja: Nuk e kam pasur asnjëherë.
Farmacia 8
Qytetarja: Si jeni? E keni këtë ilaçin, të lutem?
Farmacistja: Jo, nuk e kemi!
Për këtë problem emisioni i drejtohet Fondit të Sigurimit të Detyrueshëm të Kujdesit Shëndetësor, i cili përgjigjet se ilaçi Viread është në listën e barnave të rimbursueshme 2024, është alternativë e shtatë e principit aktiv Tenofovir 245 mg. Ky bar është me bashkëpagesë nga pacientët. Për sa i përket asaj nëse një ilaç mund të shitet me çmim më të lartë se ai që ka në vulë, argumentojnë se barnat e përfshira në listë janë të regjistruara në Republikën e Shqipërisë ose të pajisur me leje importi nga Ministria e Shëndetësisë që do të thotë se nuk duhet të kalohet çmimi i vulës.
Pas shumë kërkimesh ilaçi gjendet me porosi në një farmaci medikamentin e kërkuar me çmimin dyfish më të lartë, 230 mijë lekë të vjetra.
Qytetarja: E keni këtë ilaçin, të lutem?
Farmacistja: Jo. Vetëm me porosi bëhet.
Qytetarja: Me porosi dhe sa kushton, të lutem?
Farmacistja: 230 mijë lekë.
Qytetarja: Sa?
Farmacistja: 230!
“Stop” drejtohet në farmacinë e spitalit që rekomandon një farmaci specifike.
Qytetarja: Si jeni? Të lutem, e keni këtë ilaçin?
Farmacistja: Jo, nuk e kemi. Merret në farmacitë e rrjetit të hapur.
Qytetarja: Po s’kishte në farmaci.
Farmacistja: Ka, si s’ka? Gjej një farmaci me rimbursim!
Farmacistja tjetër: Te “Lekli Farma”.
Farmacistja: Te “Lekli”. Ata na e sillnin ne, nuk e di tani.
Në farmaci kanë një shpjegim se pse nuk shitet ilaçi me çmimin e vulës. Ky ilaç rimbursohet nga shteti, por vetëm me 5 mijë lekë të vjetra dhe pjesa tjetër paguhet privatisht.
Qytetarja: Si jeni?
Farmacistja: Mirë! Si jeni ju?
Qytetarja: E keni këtë ilaçin, të lutem?
Farmacistja: Po! 123 e 700!
Qytetarja: Sa është?
Farmacistja: 123 e 700!
Qytetarja: Po ngaqë këtu te pulla shënon 112!
Farmacistja: Po! Viread-i ka qenë preparat që merrej me rimbursim në spital, por nga qershori Viread-i kaloi me rimbursim në farmacitë e rrjetit të hapur. Tani në farmacitë e rrjetit të hapur, nëse ti e merr me rimbursim, e merr 118 mijë lekë (të vjetra). Që do të thotë, 5 mijë lekë të rimbursohen nga shteti. Që do të thotë, vlera totale e Viread-it është 123 e 700. Tani neve, vërtet këtu e ka pullën 112, por ne nuk e shesim dot më lirë se ç’e shet rimbursimi. Më kupton? Kështu që jemi të detyruar ta fiskalizojmë me këtë çmim, aq sa ka vendosur rimbursimi. Këto kanë ngelur pulla, sepse kanë ngelur më përpara edhe…
Qytetarja: E kuptoj!/tvklan.al
