Një qytetar ka denoncuar publikisht postën private “Albania Courier”, pasi sipas tij po abuzon me pakot e porositura jashtë vendit.
Ai deklaron se ka bërë disa porosi jashtë vendit, por “Albania Courier” i ka bashkuar të gjitha porositë e tij në një të vetme dhe për këtë ai ka paguar doganë. Ndërsa ai deklaron se porositë e tij janë nën vlerën 20 mijë lekë dhe se janë të veçanta nga njëra-tjetrën, ku tregon edhe mesazhet nga posta private.
Më tej denoncuesi thekson në postimin e tij në rrjetet sociale, se skandali nuk qëndron vetëm tek bashkimi i të gjitha porosive në një të vetme, por në fund ai nuk ka marrë faturë për pagesën e kryer dhe hedh dyshime se paratë nuk shkojnë për taksën e doganës.
“Nuk e di nëse është shteti shqiptar, dogana, apo kjo posta e re që është hapur, por di që do paguani doganë. Në fakt, kur blenë tek Temu, ti blen një produkt të veçantë, nënë vlerën 20 mijë lekë dhe posta të çon mesazh për secilin nga produktet hajdeni merreni. Po kur shkon aty, ato t’i kanë mbledh të gjitha bashkë. Pse duhet t’i mbledhin të gjitha bashkë? Ato janë pako të veçanta. Dhe ato nuk të japin asnjë lloj sqarimi, po thonë vetëm kështu është. Ndërkohë mesazhet janë të veçanta, pra çdo pako është e veçantë. Aty ku shkova pashë shumë njerëz që nuk e dinin dhe minimalisht të dërgonin një mesazh që ke për të paguar doganë. Mirë kjo, po ti firmosje diçka dhe nuk të jepnin faturë. Unë nuk di se kujt ia kam paguar këto lekë, unë nuk kam një vërtetësi që kam paguar këto lekë. Dhe këtu më lind dyshimi se këto lekë nuk shkojnë aty ku duhet dhe është një vjedhje! Të vjen keq se të bëjnë budalla sy për sy”- deklaron qytetari në videon e shpërnarë në rrjetet sociale.
