Kryedemokrati Sali Berisha deklaron se vendimi i parë që do të marrë PD sapo të vijë në pushtet pas 11 majit, do të jetë hapja e TikTok.
Në një deklaratë për mediat, Berisha tha se Rama e mbylli këtë rrjet social, për shkak se PD ishte shumë më lart me shikueshmërinë se PS në TikTok dhe për të vërtetuar këtë, Berisha tregoi edhe një studim.
Ai shton më tej se me mbylljen e TikTok Rama synon të godasë fjalën e lirë të opozitës.
“Partia Demokratike është shumë më lart nga partia e krimit në këtë studim. Prandaj Rama e mbylli Tik Tok. Është pikërisht ky shkak që Rama e mbylli Tik Tok. Dënoj me ashpërsinë më të madhe këtë akt prej xhelati të fjalës së lirë të narkodiktatorit Edi Rama.
Do të marrim masa kundër mbylljes së kësaj platforme. Unë pranoj se është platform më e ndjeshme ndaj fenomeneve të dhunës, por ato duhen kontrolluar. Akti është ekuivalent. Nuk di ndonjë vend tjetër të kenë ndaluar Tik Tok në vend, por sigurisht do e ndjekin edhe narkodiktatorët e tjerë.
Thotë jam këshilluar me prindërit, por ata nuk e përdorin Tik Tok. Akti i parë pas zgjedhjeve të 11 majit do të ketë hapja e plotë e Tik Tok dhe dënimi i xhelatit të fjalës së lirë, Edi Rama, për shkeljen e Kushtetutës”, tha Berisha.
