Deputeti i Partisë Demokratike, Tritan Shehu, ka deklaruar se mbrojtja që tenton ti bëjë kryeministri Rama, krerëve të UÇK, që akuzohen nga Gjykata Ndërkombëtare e Hagës është thjeshtë një hipokrizi.
I ftuar në një lidhje direkte në Syri TV, Shehu tha se në një kohë që Rama refuzon të njohë gjenocidin serb në Kosovë, i cili ishte dhe fillesa e luftës së UÇK-së, atëherë dhe mbrojtja që ai rreket ti bëjë atyre është thjeshtë formale.
“Parlamenti i Kosovës e ka njohur prej kohësh Gjenocidin serb në Kosovë. Rama ngre problemin e dënimit të padrejtë të krerëve të UÇK në Kosovë. Ok shumë në rregull. Por si mund ti kundërvihesh hapave të padrejtë të disa organizmave ndërkombëtarë të UÇK-së, por nuk the që atje iniciator ka qenë gjenocidi serb kundër Kosovarëve, i cili shpërtheu luftën, shpërtheu konfliktet dhe u bë gjenerues i krimeve monstruoze ndaj popullit Kosovar. Pra nuk mund të mbrosh as UÇK-në në rast se ti nuk dënon, nuk bën publike, nuk ngre zërin lart pa dënuar gjenocidin serb në Kosovë, sepse atje çdo gjë ka filluar nga gjenocidi serb. Luftën atje nuk e filloi kush tjetër veç Serbisë. Erdhi si pasojë e politikave millosheviçiane, të mohimit të të drejtave, se kjo është një gjë shumë më e gjëra sesa vrasjet, të mohimit të gjuhës, identitetit që Kosova duhet të mbrojë. Pra, që këtu bie në një impakt shumë të çuditshëm, dhe tregon se kërkesa që bëhet në mbrojtje të UÇK-së është formale është një hipokrizi, ashtu si hipokrizi ishte i gjithë ai kuvend atje nga kjo mazhorancë e cila e kthehu në një hipokrizi dhe teatër të saj” tha Shehu.
