Kreu i Demokratëve EuroAtlantikë, Lulzim Basha ka denoncuar sërish ditën e sotme se si mazhoranca po i mban peng dy amendamentet e depozituara prej tij në Kuvend, ku pretendon se ato i japin mbështetje konkrete institucioneve të reja të drejtësisë, SPAK dhe GJKKO.
Në një postim në rrjetet sociale, Basha shkruan se mbështet edhe kërkesën e Prokurorisë së Posaçme për të mundësuar ripërtëritjen e mandateve të prokurorëve.
Sipas tij, në zgjedhjet parlamentare të 11 Majit, qytetarët kanë vetëm dy alternativa, njëra që mbështet fundin e pandëshkueshmërisë dhe tjetra që kërkon me çdo kusht ta mbajë veten mbi ligjin.
Postimi i plotë i Lulzim Bashës:
Korrupsioni gërryen ekonominë, dobëson demokracinë dhe i detyron të rinjtë të largohen nga vendi. Shqipëria ka nevojë për një të ardhme të ndershme, ku meritokracia të triumfojë, ekonomia të lulëzojë dhe rinia të ndërtojë ëndrrat e saj këtu, jo jashtë vendit.
Mbështetja jonë ndaj SPAK nuk është me fjalë por me vepra. Ne kemi depozituar dy amendamente në Kuvendin e Shqipërisë, që po mbahen peng nga një mazhorancë e korruptuar, e cila është në konflikt interesi me punën e Prokurorisë së Posaçme.
Amendamenti i Parë:
✅ Krijimi i sektorit të ndihmës ligjore për të mbështetur prokurorët në hetimin dhe përpunimin e çështjeve komplekse.
✅ Garanci për prokurorët pas mandatit të tyre, duke rregulluar emërimin dhe përfitimet financiare në përfundim të mandatit në SPAK.
Amendamenti i Dytë:
✅ Kompetencë ekskluzive për GJKKO për ekzekutimin e vendimeve penale dhe shqyrtimin e kërkesave për ulje dënimi.
✅ Ekstradime dhe njohje vendimesh të huaja të shqyrtohen vetëm nga GJKKO për veprat penale të grupeve kriminale.
✅ Përshtatje të legjislacionit të vitit 2009 për t’u harmonizuar me ndryshimet e propozuara.
Po ashtu, ne kemi mbështetur kërkesën e Prokurorisë së Posaçme për të mundësuar ripërtëritjen e mandateve të prokurorëve, sepse jemi rreshtuar pa kushte në krah të atyre që duan të çrrënjosin korrupsionin të përhapur në çdo nivel të qeverisjes.
Është tashmë e qartë për të gjithë se më 11 Maj shqiptarët do të kenë përballë dy alternativa: njëra që mbështet fundin e pandëshkueshmërisë dhe tjetra që kërkon me çdo kusht ta mbajë veten mbi ligjin.
Zgjedhjet e 11 majit janë mundësia jonë për ta çliruar Shqipërinë nga frika dhe për të ndërtuar një të ardhme më të drejtë!
