Anëtari i Kryesisë së Partisë Demokratike, Genc Pollo, ka analizuar situatën politike dhe institucionale në vend, duke e cilësuar Shqipërinë në një regres të përgjithshëm.
Sipas tij, konsolidimi i një regjimi autoritar dhe kleptokratik nën qeverisjen e kryeministrit Rama në dekadën e fundit ka cenuar rëndë demokracinë dhe shtetin e së drejtës.
Pollo theksoi se opozita ka treguar rezistencë për të mbrojtur parimet demokratike, edhe përmes mjeteve jo konvencionale, të cilat ai i konsideroi të justifikuara.
Pollo thekson se qeveria Rama është një qeveri që e ktheu fjalën “Rilindje” në një armë për vjedhje masive.
“Ne jemi në një regres të përgjithshëm, duam apo s’duam ta pranojmë, të kësaj forme të organizimit të shtetit.
Në 10 vitet e fundit, sado kritikë të kemi qenë në të shkuarën, prapëseprapë është bërë e mundur të kryhet transferimi i pushtetit me votë ose nëpërmjet rrugëve kushtetuese.
Me Ramën në këto 10 vite kemi parë konsolidimin e një regjimi autoritar dhe kleptokratik, ndaj rezistenca dhe mjetet jo konvencionale, sipas mendimit tim, janë të justifikuara.
Ju folët për djegie karrigesh për të protestuar ndaj mbajtjes në arrest shtëpie në mënyrë të padrejtë të kryetarit të opozitës, Berisha. Unë iu referova një pjese të mëparshme të rezistencës në parlament nga opozita, pasi patëm një rast që nuk ka të ngjashëm në të kaluarën. Është krejtësisht i paprecedent fakti që, në mënyrë të njëkohshme, i janë mohuar disa të drejta themelore opozitës parlamentare.
Nëse ju kujtohet, në shtator të një viti më parë dhe në maj të këtij viti, patëm akte rezistence, duke përmbysur karriget dhe përdorur flakadanë, pasi opozita u përjashtua nga procesi i reformës zgjedhore. Kjo gjë nuk kishte ndodhur asnjëherë më parë, që nga viti 2000, kur u arrit marrëveshja e famshme Berisha-Nano, ndërmjetësuar nga OSBE-ja. Në atë kohë, u vendos që reforma zgjedhore të kryhej nga të gjitha forcat politike dhe të mos bëhej kurrë në dëm të një pale, qoftë kur Partia Demokratike ishte në pushtet, qoftë kur Partia Socialiste ishte në pushtet.
Pra, kjo lloj rezistence, sado joestetike mund të duket, ishte e rëndësishme për demokracinë. Ajo pati efektin korrigjues, duke shënuar një fitore për opozitën. Por, më e rëndësishme se fitorja e opozitës ishte fitorja e demokracisë, pasi u rivendos një farë balancimi. Ky balancim mund të jetë i papërsosur, mund të ketë ende gjëra për t’u bërë, por një shtrembërim i madh që i ishte bërë demokracisë gjatë verës së vitit të kaluar, u korrigjua në prill dhe maj të këtij viti.
Partia Demokratike ka qenë kampione, ose më saktë superkampione, në denoncimin e korrupsionit dhe abuzimit qeveritar. Ajo ka qenë gjithmonë disa hapa përpara mediave të lira ende të pakapura, shoqërisë civile ende të lirë dhe të pakapur, si dhe përpara ndërkombëtarëve që dikur kanë luajtur një rol të rëndësishëm. Ata ndërkombëtarë që janë parimorë dhe të pakapur vazhdojnë të reflektojnë atë që opozita ka thënë në publik dhe në kuvend.
Nëse shohim dokumentet gjyqësore që publikohen herë pas here, ato, në një mënyrë ose tjetër, pasqyrojnë të vërtetat që opozita ka deklaruar në mënyrë të dokumentuar dhe bindëse.
Publiku, në shumicë, tashmë e di se çfarë thotë Partia Demokratike dhe cilat janë të vërtetat e saj. Nuk besoj se ka mbetur dikush në Shqipëri që ende ka nevojë t’i mbushet mendja për faktin se qeveria Rama është një qeveri që, fatkeqësisht, e ktheu fjalën e bukur “Rilindje” në një armë për vjedhje masive.
Kaq duhet, por kaq nuk mjafton.”- tha Pollo në Syri TV.
