Kreu i PD-së, Sali Berisha në fjalën e tij para mbledhjes së Këshillit Kombëtar të PD, ka bërë premtimin publik se kur PD të vijë në pushtet çmimet e energjisë dhe të ujit të pijshëm do të jenë në bazë të rrogës që marrin qytetarët.
Më tej Berisha u shpreh se beteja në vitin e parë të qeverisë do të jetë për të shtruar siç tha ai, “bazën e një starti të fuqishëm për të dalë përsëri në krye të vendeve të rajonit për rrogat dhe pensionet”.
“Nuk mundet shteti ti shesë energjinë tjetrit me të njëjtin çmim, si atij me 500 euro rrogën dhe atij me 7000 euro rrogën. Jo kurrë, kjo nuk do të ndodhë. Kjo do të sanksionohet dhe çmimet e energjisë, të ujit të pijshëm dhe disa shërbime do të proporciohen sipas rrogave dhe të ardhurave. E gjithë beteja jonë vitin e parë të qeverisjes do të jetë të shtrojmë bazën e një starti të fuqishëm për të dalë përsëri në krye të vendeve të rajonit për rrogat dhe pensionet”, u shpreh kreu i PD.
Ish kryeministri akuzoi qeverinë se ka instaluar një mekanizëm të turpshëm për të vjedhur buxhetin.
“Ne e prokuronim rrugën Hani i Hotit-Shkodër, nuk na shkonte në mendje që ta prokuronim rrugën Shkodër-Shtoj, Shtoj-Dobraç, Dobraç-Koplik, e me radhë. Këta nuk dine gjë tjetër vetëm lote. Këta kanë futur një mekanizëm të turpshëm, kriminal. Si mund të ndash 13 km në 14 kontrata. Po ja ku ishte rruga e Kombit, nga Rrësheni në Kalimash, një kontratë. Rruga Tiranë-Elbasan një kontratë, nga Orikumi në Sarandë një kontratë. Nga kthesa e Levanit në Memaliaj një kontratë. Kurse këtyre u shkon loti sa e gjithë rruga. Duhet tja shpjegoni qytetarëve, nuk është cështje parash. Ne do ndërtojmë më shumë, por edhe sikur mos ndërtojmë në do rrisim rrogat. Por kur vjen puna për përparësi, qytetarët janë të parët”, tha ndër të tjera kreu i PD.
