Gjykata e Posaçme ka pranuar këtë të premte kërkesën e SPAK dhe ka kaluar për gjykim dosjen e inceneratorit të Tiranës, ku në total janë marrë të pandehur 12 persona.
Mësohet se vetëm tre prej të pandehurve kanë kërkuar gjykim të shkuruar, më konkretisht Silena Tola, Alba Thoma dhe Pëllumb Abeshi. Kjo kërkesë do shqyrtohet në seancën e ardhshme nga një tjetër gjyqtar.
Ndërsa të pandehurit e tjerë, Lefter Koka, Erjon Murataj, Bledar Karoli, Taulant Tusha, Namik Simixhiu, Etleva Kondi, Valbona Ballgjini, Sidita Kopliku dhe Jetmir Llapaj kanë kërkuar procedurën e gjykimit të zakonshëm.
Zyrtari më i lartë që është marrë i pandehur për këtë çështje është ish-ministri i Mjedisit, Lefter Koka, i cili është dënuar edhe për inceneratorin e Fierit dhe të Elbasanit. Të pandehurit e tjerë janë zyrtar të nivelit më të ulët.
Ndërkohë, çështja për ish-sekretarin e Përgjithshëm të Ministrisë së Mjedisit Alqi Bllako për inceneratorin e Tiranës është ndarë më vete. Sa i përket dy biznesmenëve Klodian Zoto dhe Mirel Mërtiri, ata vazhdojnë të jenë ende në kërkim.
Urdhër-arreste për inceneratorin e Tiranës u lëshuan në Dhjetor të vitit 2023, ndërsa më 2 Gusht, Prokuroria e Posaçme njoftoi zyrtarisht mbylljen e hetimeve për 12 personat e akuzuar, nën dyshimin se kanë kryer veprën penale “shpërdorim detyre”.
Opozita i ka konsideruar hetimet e SPAK për inceneratorin si të cunguara dhe me “regji”, për sa kohë nuk merren të pandehur kryebashkiaku Erion Veliaj, sekretar i Përgjithshëm i Këshillit të Ministrave, Engjëll Agaçi dhe kryeministri Edi Rama.
